公共交通-免費-min

係搞環保就唔該 公共交通 免費

講要消滅城市廢氣,或者減少擠塞,大家一定講鼓勵搭公共交通,只不過,成日講果啲鼓勵 公共交通 嘅計劃到喉唔到肺,依家德國呢個汽車大國,為免歐盟因廢氣問題罰到跳舞,可能年底搞一個試驗計劃,全市公共交通免費任坐,唔好買車喇。

公共交通 免費咪消滅私家車

本來德國嘅公共交通費用之平,英國人聽到流晒口水,BahnCard 100(一張全年乜車都可以上嘅通天Pass, 4270歐羅),嘅價錢,英國一條線嘅全年通行卡都未必買到,仲未計普遍德國果啲月費之平,加上德國公共交通堅方便,所以本來就無乜買車壓力,依家政府激進到污染勁嘅城市全市公共交通任坐,咁你買車嚟做乜,至少只會喺市區或市郊出入嘅人,買車意欲大減先,呢個就叫搞環保。當然,德國嘅公共交通基建係頂得順。

聯邦政府揀咗五個城市去試,除咗因空氣污糟外,仲要睇基建承受水平,其中Essen同Bonn都係啱啱完成咗升級德鐵訊號系統工作,塞火車問題大致上消失,但我住嘅Dusseldorf就有排都唔會有得玩,因為Dusseldorf仲有唔少訊號系統需要升級,成棚人衝入S-bahn或者RE列車實搞到一鑊泡收場。香港當然可能要升級巴士基建,至可能咁玩。但至少,德國有決心係寧願俾多一大筆,都好過你班友買車。喺我住Dusseldorf同出入德國唔同大城市嘅經驗,德國嘅大城市其實堅唔多車已經。塞車呢家嘢,我好少再遇過,對上一次遇過塞車呢回事,已經係我返香港果陣。

政府好心唔好再喺交通同環保問題上吹水,一係就下定決心改善道路,減少塞車引發嘅空氣排放,一係就下決心,凡有香港身份證嘅居民都可以巴士,小巴,地鐵任坐,遊客就收天價車費,減少香港人買車嘅意欲,如果公共交通又免費又有番一定效率,邊個仲要咁傻買車,政府最多俾Uber合法化。依家香港嘅交通政策,只能用不倫不類嘅嚟形容,唯一嘅目的係搶錢,完全無解決交通同空氣問題嘅意圖,同倫敦果啲黐線政策根本上係一X樣。喺歐洲嚟講,英國佬最失敗正係公共交通同道路系統,又貴又無效又黐線。

發表迴響

你的電子郵件位址並不會被公開。 必要欄位標記為 *