香港航空-min

香港航空 玩健身中心式掠水法?

雖然 香港航空 聲稱最大股東唔再係海航,但 香港航空 啲經營手法,再加上海航依家嘅財政狀況搞成咁, 香港航空 啲優惠係唔係堅玩得過,就十分之令人擔心,好似 香港航空 嘅19999日韓港Pass,就十分之令人擔心,我唔知呢啲乜手法嚟。

香港航空 手法咁似健身中心

通常啲美容院臨執笠前,都會賣一啲異常好條款嘅套票,而 香港航空 嘅19999套票就係例子,如果有人飛足510程,平均每程未計稅為39蚊港紙,呢個係一個嚴重虧蝕嘅票價,根本係唔合理,係連飛機餐都俾唔到,我想問邊個會買,雖然理論上無人坐足510程,因為日韓同香港之間距離,無人可以英到住喺日本再去香港返工,或住喺香港再去日本返工。所以呢張飛,我自己十分之懷疑,玩綽頭都唔係玩到呢個款,特別大家都知海南航空財政狀況嘅風頭火勢。

而成件事真係最令我懷疑係,呢類筍到無倫嘅飛,一般係航空公司自己賣番,因為咁樣至唔會蝕到入肉,但依家係一定經旅行社買,咁旅行社都要賺㗎,呢個安排,令我十分之擔心旅遊業議會嘅賠償基金。因為經旅行社賣嘅飛,一般有旅遊業議會賠償基金嘅徵費同印花,一旦航空公司有乜事,係係咪由旅遊業議會賠償基金出錢去賠,呢個做法係十分之令人有呢個懷疑,否則點解要經旅行社賣,而且如果堅係賣得多,隨時會令旅遊業議會果六億幾賠償基金無晒。雖然理論上,齋買機票係唔受旅遊業賠償基金管,但旅行社會點賣呢個套票,我堅係識條鐵,所以旅遊業議會賠償基金有無問過依家香港航空想搞乜,呢個一定要問題。

海航依家財政狀況計,除非 香港航空 賣俾財政狀況嘅財團,否則依家 香港航空 系嘅航空公司嘅特惠,或者長期預售機票,都要諗清楚好唔好買,因為一旦亂買嘅結果,係可以係連渣都無,當好多網民都懷疑呢個特惠好可能係一個伏果陣,其實 香港航空 如果要繼續做落去,不如將股權賣俾外資大航空聯盟嘅非中國資本成員航空公司,例如Lufthansa之類好過,當然, 香港航空 嘅財政狀況,都係一個不解之謎,根本好難令人可以敢買呢類飛。

2 thoughts on “香港航空 玩健身中心式掠水法?

  1. 「經旅行社賣嘅飛,一般有旅遊業議會賠償基金嘅徵費同印花」

    非也,因為人地講到明「根據法例,只有包括離港交通、住宿、編排活動全部三項或其中兩項的外遊服務才算旅行團,有關收據才必須蓋上印花。」
    齋代售機票係不受旅遊業議會賠償基金既保障,以往我地向旅行社代訂機票都唔會有徵費印花。

    1. 「旅行社會點賣呢個套票,我堅係識條鐵」,如果係旅行社自己加住宿變套餐,咁首先呢個套票係不限日期,所以旅行社仲要提供埋「不限日期」既酒店訂房服務先得。

      更重要既係,既然係旅行社自己搞套餐,咁確保可以成行就係旅行社既責任。就算航空公司執笠,都唔係「旅行社倒閉」冇得賠,旅行社自己要幫客人改機票。當然如果你話旅行社都搞唔掂執埋笠就另計。

發表迴響

你的電子郵件位址並不會被公開。 必要欄位標記為 *