網媒-收費網站

網媒 國際化嘅思考

依家香港係越嚟越無言論自由,而Facebook大中華班hihi,明顯係壓緊同政治有關嘅page同 網媒 喺news feed嘅位置,如果我唔係成檔嘢搬咗去德國,完成成個page由德國註冊機構持有同營運嘅過程,相信係買極facebook廣告都唔知死喺邊。但 網媒 搬到海外,係唔係一個咁容易嘅事。

網媒 搬到海外難度在內容

雖然我呢檔嘢營運基地喺德國,只不過,喺我呢檔嘢搬去德國之前,我過去十幾年立足香港,可以評論台灣、新加坡當地時事,甚至英國事都唔會太out of touch,一個全球化嘅生活習慣同視野係最重要,而呢樣嘢,正正係香港果啲 網媒 想搬去其他國家立足同營運嘅真正難度所在。喺互聯網年代,硬件甚至電腦軟件技術,其實本身並唔係太大嘅障礙。

喺歐洲人嚟講,呢套飛象過河玩法由來已久,喺德國、英國未開放商業廣播之前,其實歐洲大部分都收緊Radio Television Luxemburg嘅商業廣播,歐洲最大嘅商業電視台集團RTL,RTL本來就係盧森堡電台嘅縮寫,RTL喺盧森堡做總部,然後用強力天線將廣播射到去英國、德國、法國等地,並同時收廣告,RTL集團就係咁樣起家。所以喺歐洲人嚟講,地理距離一直都唔係做傳媒應有嘅障礙。甚至依家雖然RTL Group喺英、法、德有製作中心,全歐洲都有分台,但RTL嘅技術廣播中心,仍然喺盧森堡。

喺其他國家營運一個針對香港人 網媒 未必難,但隨香港人可能四處流散,咁又可唔可以做到因應當地環境嘅內容,以依家香港唔少傳媒人嘅視野,我對他們嘅能力係十分之懷疑。如果真係做到呢樣嘢,就唔會過咗咁多年,喺全世界三個唔同國家嘅報紙寫嘢,仲要寫番當地嘢嘅評論人,除咗我,跟住有Jacky Lim,然後就係咁多。香港做評論嘅人,視野可以擴到幾闊,呢個至係一個真正關鍵問題,但你睇香港搞民主運動啲友仔嘅國際視野,仲未計香港充斥果啲假國際視野,假國際關係友仔四圍招搖,你真係對香港有幾多 網媒 成功可以喺海外立足有信心。

發表迴響

你的電子郵件位址並不會被公開。 必要欄位標記為 *