九巴-min

星期日休息: 九巴 大車禍與香港公共交通嘅前途

九巴 史無前例嘅大車禍,變咗世界新聞,連BBC World Europe都要排二條,早過南北韓領袖會面,可以見到呢件事係幾震撼。司機嘅EQ,巴膠嘅問題,我已經講過,但另一個問題亦值得探討,喺公共交通利潤越嚟越微薄嘅今日,係唔係要有第二條路處理公共交通嘅問題。

九巴 加車費都唔係辦法

九巴 搞出彌天大禍,梗係同無辦法請到有質素嘅司機有關,一個有炒車前科,駕駛態度差嘅巴膠揸架巴士,堅係出事。但唔通又加價,一方面市民食米唔知米貴,另一方面,香港樓價貴成咁,再加車費就變成攞命之舉。我唔認為所有公共交通全部政府營運係辦法,但香港呢套英式公共交通,不單唔鼓勵民眾使用公共交通,亦對香港市民構成十分之大嘅生活負擔。所以,香港要諗一套改革方案,唔係用日式或英式嘅逐次付費,係期望用盡所有公共交通系統,而做到減少汽車使用。

喺德國,雖然有唔少人喺無限速嘅Autobahn飛車,但無車牌嘅人都唔少,有次我同我喺德國相熟嘅銀行經理傾偈,佢無車牌,唔係無錢揸車,德國揸車唔會比香港貴,而且德國嘅車位好充足,周街泊被人拖返差館係抵死(無錯,德國喺條街亂泊,係立即拖走,牛肉乾都費時派,有事同差佬講,香港咁做一定大大減少老闆車問題),佢認為係唔駛買車,佢市中心住,市中心返工,揸車嚟把叉。點解德國人會咁諗,唔係車牌難考,而係德國公共交通服務係費用合理。

好似我係揸Firmen Ticket(商會月票,係商會會員福利之一),每月五十六蚊歐羅,536蚊港紙,但係全Dusseldorf市區範圍,電車、地鐵、S-Bahn同巴士任坐,所以喺德國唔買飛搭車係傻佬所為,因為捉到罰六十蚊歐羅,但你買市內月票都係五十幾蚊歐羅,跨區可能貴少少,都係110至140蚊歐羅,但講緊路程係香港至東莞之間咁長。點解咁平,因為州政府同市政府大量補貼,透過交通協會Verkehrsverbünde派俾唔同營運商。雖然好多營運商都係市政府擁有(例如Rheinbahn AG),或聯邦政府擁有(例如德鐵),但仍然會引入外來公司,例如荷蘭鐵路公司,甚至英國National Express(所以NRW州係有名嘅火車聯合國)。

如果香港要減少車輛,而公共交通營運商係有錢賺,呢套歐陸模式係可以考慮,喺德國,一般人坐短程交通係唔會考慮果程嘅車費,而且只會考慮最短時間抵達目的地,咁成件事合理好多,所以德國市區一般唔多車,甚至市區塞車呢樣嘢好少發生,駛入市區嘅車,好多時剩番係貨車,仲要其實最多係網購嘅派件車,所以德國郵政同UPS,都係用電動車,甚至更怪嘅方式入市區,租晒成架電車去派貨(德累斯頓嘅Car-go Tram,除咗幫福士工廠之間運零件,依家係會幫德國郵政運貨),或者推架手拉郵車上電車往來派遞局同目的地。

當然,如果行呢套,唔該唔好再狗屎垃圾塞晒啲人入地鐵,德國係有四層鐵路服務本地交通,有RE(Regio-Express)、S-Bahn、電車/地鐵(喺比較細嘅城市,地鐵同電車係同一樣嘢嚟,大城市會分開)、巴士,但四樣嘢各有分工,RE係市同市交通,即係日式特急線,S-Bahn係鎮同鎮交通,電車同地鐵喺城市區域嘅交通,而巴士係接駁啲人由住宅區去火車站,或者由一啲鎮仔、大學飛Autobahn直去市區,以免S-Bahn同RE爆棚。香港由於地理形勢,實際上係剩番S-Bahn,同地鐵,而且唔可能不斷加新鐵路線,咁情況下,要分番啲客俾巴士、小巴係無可厚非。

如果啲議員、政府係有心解決香港公共交通系統問題,包括營運商困難,以及市民被迫買車呢啲膠問題,最好係商討成個公共交通系統營運費用、融資等方面嘅改革,當然對住遊客,我係支持搶錢式車費,所以德國啲單程飛貴到hihi係可以理解,因為當市居民同公司有福利係正常,好似濫用B3X走私嘅hihi,我係支持收到$100一程嘅天價,公共交通運貨未必有問題,但唔係俾你班友走私。只不過,香港有邊個諗過,呢個全盤公共交通改革嘅問題,大家繼續塞到X老母,大家繼續要忍受呢啲hihi司機直至永遠。

3 thoughts on “星期日休息: 九巴 大車禍與香港公共交通嘅前途

  1. 「點解咁平,因為州政府同市政府大量補貼……」
    香港人口密度高,都要搞到靠公帑補貼?

  2. 「當然對住遊客,我係支持搶錢式車費,所以德國啲單程飛貴到hihi係可以理解……」
    在德國旅遊至少都要買張日票吧!

發表迴響

你的電子郵件位址並不會被公開。 必要欄位標記為 *