大埔公路-min

大埔公路 巴士車禍:可以思考一啲問題

大埔公路 發生嚴重巴士車禍,十九人死亡。呢件事對我呢啲巴士迷確匪夷所思,因為Volvo Super Olympian 配鋼水相對重嘅 Wright 車身係無乜理由咁反車法,除咗司機駕駛不當,真係幾難有其他解釋,呢部唔係本身相對容易傾側嘅 Dennis Dragon (1998年年初二大車禍咪車速過快掟彎出事)。而巴膠,正係其實一個要思考嘅問題。

大埔公路 大車禍與巴膠

對巴士有興趣研究本身唔係錯,我都係因做巴士迷而改革中大校巴系統,甚至我依家去德國都多少同巴士有關。但巴膠同巴敗就完全另一回事,巴膠同巴敗,我唔知邊個星球爆出嚟嘅奇怪生物,佢地由影車影到阻礙交通(攞住枝長炮影「標準相」果啲hihi),到從事偷竊同破壞,到堅做巴士司機,但駕駛態度完全唔係一個專業態度。如果呢個司機無意外前科,我都唔敢咁早斷定呢個司機好大機會係駕駛態度有問題,但依家知佢有前科,就另一回事,呢個人嘅駕駛態度,肯定係成件事嘅調查方向之一。

只不過,另一個問題大家都要諗,點解一個咁嘅前科嘅司機,九巴都要佢繼續揸巴士。其實理由好簡單,香港一直唔夠巴士司機。香港人又要車費平,但又唔肯接受巴士司機係一門專業,而且係需要充足休息,同一份專業人工嘅職業,咁香港無好似台灣咁,有咁多危險司機,已經係十分好彩同大命。

巴士司機,孭住成百幾客,其實充分休息係重要,仲有係優厚人工,講緊唔係要揸天地更果啲特別更至𢭃到兩萬人工果種,喺德國,巴士司機人工平均每月2600歐羅(25000港紙),仲要係揸單層為主,如果柏林果啲有雙層巴士嘅城市,人工仲高,倫敦揸巴士人工月薪係38000港紙,當然,倫敦物價高到黐X線,但倫敦巴士司機人工以時薪計,都高過唔少工種1英鎊,無他,你孭住咁多人嘅命仔,安全係絕對重要,點解唔可以俾一份優厚嘅人工佢地呢?我諗香港嘅公共交通車費同津貼政策,係應該思考一下係唔係同歐洲睇齊,否則得啲巴膠,或者駕駛紀錄有問題嘅人揸巴士,大家仲敢坐巴士。唔好唔記得,鐵路唔係萬能的。

仲有,乘客因「遲到」亂咁鬧司機係唔啱,有時候,寧可遲到,莫揸快車,呢個係常識嚟。

One thought on “大埔公路 巴士車禍:可以思考一啲問題

發表迴響

你的電子郵件位址並不會被公開。 必要欄位標記為 *