股災-min

股災 嚟咗,跟住支爆?

見到 股災 ,一定有丁蟹,呢個幾乎係常識,當美國同歐洲個市好似食瀉藥咁嘅時候,其實香港咁跌法都合情合理,喺全球化嘅年代,邊有股市可以喺股災獨善其身至得。當大家以為喺股市賺好多果陣,其實有幾多人知道災難其實已經嚟咗。

股災 源於利率上升

首先我自己利申,我係連香港強積金都斬埋,其實 股災 唔睇沈大師預測(沈大師財毀會嘅預測仲有趣,你買佢對家實有斬獲,如果你唔知財毀會係乜,我只可講你膠力不足),都知個市去到尾聲,一方面美國嘅息口走勢明顯上調,其實息升則股跌,呢個係股票投資ABC嚟,咁都唔識走,你無事嘛。當然利率明顯上調,其實股市甚至樓市都相當凶險,如果你回歸基本步,就唔會被唔知乜茂利乾炒嘅市呃到,訂咗貴一貴年夜飯酒席走都走唔切。

但更大問題唔係美國,而係中國,大家諗吓,海航有國開行條credit line都水緊到咁,你覺得一般中國公司可以有幾水緊呢,實際上人仔嘅息口炒到乜地步,真係天曉得,中國有大量嘅地下金融活動,呢個都係常識嚟。當中國甲、乙、丙、丁、戊公司都水緊,臨住農曆新年之後工都開唔番果陣,你覺得唔會有問題?其實中國自己都挾息口挾到傻果陣,大家都知其實離大勢已去不遠,甚至啲中國人為咗走數,香港啲資產都賣埋,跟住大家知道有乜事發生。

支爆其實喺息口咁升法果陣幾成定局,依家全世界得番歐洲有cheap money供應,但歐洲人依家好多都認為cheap money唔last得耐,特別全世界都會嚟歐元區搶錢果陣,你覺得仲有cheap money?咪玩喇。當資金越嚟越貴果陣,唔好話股市喇,係連樓市都仆街,甚至喺負資產同高息口雙重夾擊嘅情況下,跟住你就玩完咗,件事就係咁簡單。所以依家樓市仲係唔係咁好景,搞得唔好,隨時衰過1997-1998年果次金融風暴,大家都知果次金融風暴係香港依家困境嘅起源。

當然一旦中國經濟玩完,後果就嚴重好多,中國會唔會變成第二個敘利亞,甚至變成南斯拉夫翻版,如果變南斯拉夫翻版,真係祝大家好運。

發表迴響

你的電子郵件位址並不會被公開。 必要欄位標記為 *