大中華膠-min

星期日休息: 大中華膠 如何玩殘香港民主運動

喺近排香港政治陷入進一步困境之際,英國、歐盟同美國都越嚟越積極介入果陣,有班 大中華膠 ,仲話歐盟同美國無乜用,有啲係擺明 大中華膠 ,例如某過期名嘴,有啲係扮晒唔係 大中華膠 ,但實際都係 大中華膠 ,例如某啲認為香港人可以統治中國嘅狂妄之士,講緊建設民主中國班友講嘅嘢,但又要鬧市乜乜乜毒。呢班友,堅係玩殘香港民主運動。只不過,我今日想探討嘅問題係,呢班 大中華膠 係點樣走出嚟,同點樣用偏見嚟禍害香港。

大中華膠 嘅錯誤民族主義觀

我對 大中華膠 呢種嘢嚟來源,唔係完全唔理解,畢竟世界走向種族分界由血統去分界,改為用語言、文化去分界,都係冷戰結束後嘅事,香港人認識嘅當代英國,都係1997年貝理雅上台後嘅事,所以BREXIT呢件事,都唔係歷史上無從解釋,某程度係舊英國嘅backlash嚟。喺冷戰結束前,係有基於血統嘅種族歧視,白人優越論未完全消退,曼德拉都係定康之治果個年代由政治犯變成南非總統。對於唔少受過種族歧視氣嘅人,我唔會怪佢地有可能對西方國家嘅人唔信任同唔友善。

只不過,呢班友無睇到一樣嘢,就係世界除咗中國、日本、韓國呢啲國家,由於全球化大浪潮,同埋冷戰結束,以及全球人口老化,西方國家需要移民嚟填補生產力缺口嘅結構改變,連一向都講血統主義嘅歐陸國家,都變成將語言、文化、國籍作為界定「民族身份」嘅工具,原本係美國、新加坡係多元文化同種族國家,依家係差唔多成個歐洲都係,包括英國。特別冷戰結束後,大家更防止納粹死灰復燃,血統民族論變成咗西方禁忌,甚至為法律所禁止,而 大中華膠 對西方嘅不信任,不單係過時,而且只代表有班友係對西方無知,一直唔融入當地社會,但又要阻止年青一代去向西方求援,佢地同我啲祖宗,即係華裔印尼人,以為遠方嘅共產中國,比支持多元種族嘅印尼知識分子更可靠一樣愚昧無知。

當然,有部分 大中華膠 唔係因政治理念去阻止年青人向西方求援,而係佢地同中共有檯底交易,但有啲 大中華膠 ,卻係自己愚昧,唔肯承認自己愚昧,因此迫年青人要跟佢地走,但今日嘅年青人係乜人,佢地完全係全球化下嘅產品,佢地嘅朋友遍布世界各地,我相信除咗香港眾志仲有人天真信呢班 大中華膠 ,其實大部分年青人,都知道依家 大中華膠 嘅西洋鏡,呢個亦係點解泛民喺年青人間唔受歡迎嘅原因。

大中華膠 仲可以呃到人,咁都有佢地嘅理由,好似有啲年青人,喺政治資源上要依賴掌握資源嘅 大中華膠 ,侷住要陪佢地癲,所以年青人要開拓自己嘅資源網絡係重要。但有啲係因為有啲年青人,佢地未有自己深入研究西方政治嘅遊戲規則,結果有啲人講啲嘢好似天下無敵就可以大到佢地,跟住就喺啲青山邏輯之下玩。當然,有幾多人係真心相信呢啲瘋狂理論,就係另一個問題。AfD都係一個教授雲集嘅政黨,但好不幸,佢都係德國眾多政黨之中最粗鄙嘅一個。

其實 大中華膠 最大盲點在於,西方你覺得佢有幾不濟都好,你可以慢慢講道理去說服佢地,今日嘅世界都係過百年以嚟講道理嘅結果,至少依家過晒需要暴力至會聽你講道理嘅階段,你要一項政策得到實踐,或喺傳媒上曝光,係多年以嚟嘅耐性,謀略嘅累積,費邊戰略喺西方係有效,甚至某程度上,Hong Kong Watch將BNO平權提上議事日程,都係費邊戰術嘅結果,當然,喺羅馬年代,費邊係不受當時急躁嘅羅馬人歡迎,但歷史上,大家都知,無費邊羅馬共和國一早變成迦太基嘅屬國,唔會有之後羅馬帝國嘅出現。

反之,中國係無法同佢講道理,西方國家試圖同中國講道理,八國聯軍之役嘅賠款,有好多都投放番喺中國,最重要正係清華大學,今日台灣清華大學仍然係用當年賠款為基礎嘅錢去辦,反而北京果間清華大學,實際上只係徒具清華之名。西方過去三十年接納咗咁多中國留學生,中國有無進步過?大家睇中國留學生係乜款都知,咁 大中華膠 仲以為可以用講道理嘅方法去改變中國,佢地有無判斷錯誤兼搞錯時勢。

孫中山我唔鍾意呢個人,但因為呢個無 大中華膠 嘅制肘,所以公然勾結日本,最後令大清帝國覆亡。毛澤東早年都唔係 大中華膠 ,一個講得出湖南獨立嘅人,梗係可以勾結蘇聯。大家睇香港問題果陣,亦應該要考慮呢個歷史因素。

發表迴響

你的電子郵件位址並不會被公開。 必要欄位標記為 *