海航-min

海航 唔可能解決得到資金缺口

海航 嘅財政問題,可以講係近日最熱門嘅話題,雖然國開行為首銀行批出78億人民幣融資,但係果筆融資只可以用喺海南機場嘅建設,而且仲有72億人民幣嘅資金缺口,所以有傳有旅行社唔肯賣 海航 系航空公司機票,亦係呢個原因。

海航 點可能解決得到資金缺口

依家 海航 值錢可以抵押到換到Cash嘅資金,除咗堆飛機,就係海外嘅投資,當然最有希望IPO嘅Swissport,由於已經捲入同 海航 同系公司相關嘅交叉借貸,基本上IPO好有問題,除非 海航 找晒筆數先。跟住希爾頓酒店集團嘅資產,呢個係同 海航 本業有密切關連嘅資產,而且啲股票已經抵押晒,我相信唔容易甩手。跟住係啟德嘅天價地,但以新鴻基嘅謹慎作風,新鴻基地產一向唔興摸頂,一個咁保守嘅財團你想佢借錢俾你 海航 ,堅係有難度,我相信 海航 唯一可以套現方法係賤價俾新鴻基入嚟玩,不過以中國人嘅作風,點可能咁做。

依家 海航 仲有一個出售資產希望係出售手上嘅9.9%德意志銀行股權,問題係德意志銀行今年業績好差,而且俾美國同德國監管當局睇到實晒,依家德意志銀行為咗充實資產,打算將喺德國本土嘅德意志銀行分行網絡,同Postbank嘅分行網絡整合(利申:我都係Postbank客仔),只不過Postbank涉及好多唔同類型嘅客,包括涉及德國國家民生嘅德鐵、德國電訊同德國郵政都係佢嘅客(因為本來Postbank係政府嘅,德國郵政電訊私有化果陣拆開咗,後嚟又被德國郵政收購,跟住賣咗俾德意志銀行),而且好多中小企都係用Postbank,所以 海航 除咗肯賤價賣德意志銀行股份俾政府,德國同美國都信得過嘅財團,否則睬你都傻。

當國開行都只能借錢俾 海航 頂住一個機場項目果陣,你覺得中國有幾有錢,之前唔少牙斬斬話中國政府會借錢救 海航 ,我依家想知邊度嚟印人民幣救 海航 ,所以我睇法係, 海航 死係遲死定早死嘅問題,咁勇買資產除咗走資我諗唔到第二樣嘢。而依家走到乾晒,啲五毛仲話文翠珊求英國,甚至有啲過氣大中華膠名嘴都咁講,睇清楚個勢先喇,懵丙。

發表迴響

你的電子郵件位址並不會被公開。 必要欄位標記為 *