FCO-min

FCO 聲明反映英國陷入被夾困境

FCO 喺周庭被DQ後,一直無發聲明,直至1月31日,英國終於要發聲明回應事件。首相訪華期間,發啲中國唔高興嘅聲明,呢個反映 Theresa May訪華之行應該係得個桔收場,喺貿易問題上,特別開放市場上,一無所獲。

FCO 聲明反映嘅困境

但 FCO 嘅回應,另一方面亦反映喺香港心戰上,英國同歐盟爭緊香港,而依家好明顯,遇正已經逐步解決組閣問題嘅德國,英國已經陷入劣勢,再搞唔掂,歐盟變咗主導香港問題其中一方,你英國堅係有排煩。

講真,喺BREXIT後,英國對中國無乜利用價值,呢個亦係點解當初中國囂張到要英國簽字支持一帶一路嘅背景,好彩Theresa May都有番咁上下硬淨,同埋彭定康同Lord Ashdown一出信,佢有理由擋番保守黨內嘅利字行頭派。而依家英國可以同中國討價還價嘅本錢正係香港,但依家撞正係德國依家雖然未正式組閣,但依家德國嘅臨時政府,其實已經係CDU+CSU /SPD 呢個組合,所以外交政策只要無太大分歧,依家德國政府做乜嘢都唔會怕有人鬧佢,只要果件事唔駛國會立法通過。所以依家成個歐盟擺喺度,仲要依家歐盟幾個主要國家其實係持續「搜集」香港人嘅人口,加大佢地出聲嘅理由,所以英國無辦法作出回應,呢個亦係 FCO 咁遲都要出聲明嘅背景。

依家文翠珊政府十分之虛弱,隨時唔係BREXITER政變玩佢,就係親歐彭定康-馬卓安系嘅人馬玩佢,大家睇彭定康喺上議院幾有火鬧爆班BREXITER就知,所以文翠珊政府依家連BREXIT都左搖右擺,一時又話過渡期延長到三年,一時又話喺2019年3月後嚟嘅歐盟公民,佢地會享有少啲嘅權利,跟住歐盟班友已經又準備玩佢一劑,簡單嚟講,依家文翠珊政府係好難喺大事上有領導權,除非佢同戴卓爾夫人一樣,靠一場保衛英國人權利嘅戰爭確立威信,某程度上,如果唔係當初喺福克蘭群島打柒咗阿根廷,戴卓爾夫人何來威信簽《中英聯合聲明》。

但依家無阿根廷你去打柒佢,而文翠珊嘅福克蘭喺邊,其實答案好清楚。

發表迴響

你的電子郵件位址並不會被公開。 必要欄位標記為 *