海航-min

海航 幾時會爆鑊甘

海航 雖然用盡辦法去掩蓋現金不足嘅問題,但要爆煲遲早都要爆,呢間負債有成一千六百萬億美金(等於香港外匯儲備三成幾)嘅公司,依家出現150億人民幣嘅資金缺口,換言之, 海航 爆係農曆新年前後嘅問題,十分之牙煙。

海航 就爆就自己保重

雖然 海航 得到海南省財政廳支持,但呢個支持基本上係無意義,2017年海南省嘅GDP係四千四百億人民幣,仲未知當中有幾多係水份嚟,而 海航 嘅債務係一萬億人民幣,成個海南省嘅人賣撚晒都冚唔到條數。雖然海航有一堆資產,只不過大家要留意,依家 海航 嘅150億人民幣資金缺口,其實最樂觀情況嘅估算,因為佢係計咗啲資產處置方案(即係賣嘢)係得到實現,但如果啲資產處置方案節外生枝,即係個窿只會更大,呢個亦係點解債權人打算召開債權人會議嘅原因,只有一間公司出現走數嘅情況,至會搞到要準備債權人會議傾點樣還債。

由於 海航 就爆,我斷估農曆新年嘅機票,未必會走嘅,畢竟春運係一個政策範圍嘅事,國開行條credit line點都要幫手頂一頂。但如果你復活節想度假,HK Express同香港航空嘅機票基本上係要blacklist,因為好有可能係起唔到行,請揀過第二間航空公司,如果你預訂咗呢啲航空公司嘅機票,我就祝你好運喇,因為 海航 會出問題,呢個係預見得到嘅事,並唔係天方夜譚,呢個只不過一個數學問題。

但機票都係小事,機票損失都係一萬幾千,但對香港人人有關嘅,係你層樓嘅資產價值。未來半年, 海航 掃落嘅四幅地皮嘅過渡期貸款會到期,雖然啲銀行一路俾 海航 拖住唔到期,但如果仲搵唔到另一筆錢冚住條數,香港啲銀行係好難繼續咁俾 海航 炒落去,呢個亦係點解江湖傳聞 海航 要搵新鴻基地產合作,因為香港啲地產商普遍係穩陣好多,香港啲地產商一般資產係負債嘅幾倍計,負債比率好低,而且好多現金流量高嘅業務去輔助地產業務,好少好似中國班友咁玩法嘅。問題係,你依家個市係咁, 海航 係摸頂價掃地,除非有一定折讓,否則邊個會陪你 海航 癲先,仲唔驚被基金佬乘機狙擊你。屆時啟德塊地爛尾會搞出乜事,我唔知嘞。

都係果句,小心睇路,準備學誠哥撤資最穩陣。

發表迴響

你的電子郵件位址並不會被公開。 必要欄位標記為 *