鄭若驊-僭建-1-2

鄭若驊 僭建勁過唐英年

大家應該仍然記得唐英年當年約道嘅僭建有幾勁抽,只不過如果我係唐英年,一定覺得自己太早出嚟選特首。 鄭若驊 同佢老公潘樂陶嘅僭建規模之豪華,簡直係大開眼界,講僭建,點及得上 鄭若驊 至得, 鄭若驊 可以出本僭建教科書添。

鄭若驊 僭建僭成咁損失幾多公帑?

鄭若驊 同潘樂陶係專業工程師,加上單位係佢地自住,我相信喺安全上面,佢地唔會僭建到自己活埋喺地庫嘅,只不過,依家 鄭若驊 僭建僭成咁,再加上佢喺淺水灣一個單位買賣扮首置嘅走稅行為,唔知造成幾大公帑損失,呢啲做法已經同做賊無乜分別,甚至可以講成白領罪案。如果仲有藍屍可以包容 鄭若驊 ,我覺得已經去到黑白是非不分嘅程度,無人再信香港成個制度係公平公正,只不過係一個賊佬樂園。大家諗吓,香港人買唔買得起僭建面積咁大嘅單位先。

有一樣嘢,我覺得香港根本係荒謬,點解梁天琦認「襲警」罪要即時還押,而律政司司長犯法依家邊個去查,唔好講梁天琦嘅政治性,萬寧阿婆攞走印花再擺番喺公司就被人炒,咁 鄭若驊 呢啲行為點解可以繼續做律政司司長,呢啲唔係殺人放火金腰帶,修橋補路無屍骸又係乜?

其實好多香港中坑同廢老嘅正義觀好簡單,勝利球迷嘅正義觀,有權有勢就假學歷,避稅乜都得,無權無勢就講句粗口都犯法,而呢種意識形態同中國儒家嘅君君臣臣父父子子嘅仆街秩序觀有密切關係,呢種唔講公義,唔講道理,只講權力嘅價值觀,亦係好多年青人,甚至我呢啲中年人都要求告別中國嘅原因。依家香港搞到律政司司長係犯法專家呢樣嘢邊個搞出嚟,依家香港嘅宗主國中國囉,就係咁簡單,中國嘅思想污染,再加大中華膠本身就有中國人思想問題,結果只係用咗廿年,香港變成一個空有西方軀殻,但腐敗一如屎坑國家嘅地方,依家香港呢種情況,侵總統果句Shithole就係無得唔話佢唔應。

當然,泛民果種抗議手段根本無用,所以我唔多寄望泛民,甚至補選嘅Plan B同C,我自己都唔想再公開討論太多,因為好多泛民都係只係睇到眼前小利不理大義,由馮檢基到朱凱迪都係一個樣,你話我可以講乜,都係搵英國人執番掂香港一百年再算吧。

One thought on “鄭若驊 僭建勁過唐英年

  1. 鄭若驊 可以出本僭建教科書添————>佢出左丫 XD (講解建築物法例)

    中國儒家嘅君君臣臣父父子子———–>又要多謝後世小儒。孟子有講過殺了暴君也只是誅一獨夫不算弒君,所以明太祖把他的牌位趕出孔廟。(其實就算孔子也沒說要獨尊一家一姓,論語最後一章開頭就係話「四海困窮,天祿永終」,當然儒家想不出一個和平更替政權的機制,後世禪讓又只是粉飾政變,這是後話。)

發表迴響

你的電子郵件位址並不會被公開。 必要欄位標記為 *