李振成-min

星期日休息: 李振成 案與大中華膠嘅邪惡

李振成 案可以講係呢個禮拜最hit嘅話題, 李振成 作為一個美國長大嘅人,雖然佢係入籍啫,但做過美軍,入埋中情局,最後都走去背叛自己嘅國家,走去幫中共賣命,落得今日嘅下場。其實,除咗南洋華人(仲要係新加坡同在港印尼華人兩批),好多人都唔明,華人不被國際信任嘅原因,正係呢啲以血統為本嘅國族認同概念,去到任何一個國家都唔會有人信佢地。

李振成 解釋咗點解當年要拍《霧鎖南洋》

如果話華人因為種族歧視,所以好容易受中共嘅引誘,呢個係唔成理由,美國好早華人已經係佔一席位,包括政壇,呢個理由根本係講唔過去。大家睇番六十年代排華前嘅印尼就明,華人喺印尼成就非凡,但佢地係寧願幫中共都唔視印尼為家,結果咪俾印尼極端分子有機可乘。

李光耀正係睇到呢樣嘢,佢知道一個以華裔為主嘅新加坡以要取信於西方,甚至鄰近國家,新加坡華人嘅國族認同必須同中國一刀兩斷,否則隨時變成印尼翻版,當然,唔少人記住只係公投後嘅雪藏行動(Operation Coldstore),或者將華文報整合為《聯合早報》等事,但真正嘅關鍵我反而認為係1984年2月,即係香港喺中英談判最後階段播出嘅電視劇《霧鎖南洋》,要教得明上年紀嘅人必須同中國一刀兩斷,係要用軟功,

其實同中國一刀兩斷係唔係代表要忘記自己嘅歷史,其實《霧鎖南洋》嘅歌詞講得好清楚

望遠方天水茫茫
濃霧中何處是家鄉
向遠方衝過險灘
濃霧散見我新家鄉

過去的記憶世代不可遺忘
祖先的流離使我生命更堅強
霧起在南方 霧落在南方
重重迷霧鎖南洋

帶希望努力墾荒 帶理想開拓新家鄉
用希望換取希望 用理想創造新理想

充滿信心向前望
不必迷惘 黑暗到了盡頭
就會出現曙光
霧起在南方 霧落在南方
朝陽一出迷霧消

其實以上歌詞不單係新加坡確立新國族嘅關鍵,亦係新加坡最終取信西方嘅關鍵。所以第一個華人為主國家,可以攞到美國Visa Waiver Program待遇,正正係新加坡亦係呢個原因,好多中國學生甚至香港人都英語流利,但如果徹底去除大中華膠思想,係唔可能取信西方。台灣可以攞到Visa Waiver Program,無錯,台灣上層好多台奸,但台灣天然獨世代形成,係令到西方放心。

依家香港人處境未必好得過 李振成 好多,因為好多上一代人,攞咗加拿大護照都好,但骨子裡根本無做過加拿大人,只不過仍然係一個中國人,甚至無視全球化嘅大潮,只係因種族身份效忠於中國,或者揸住英國公民護照仲諗點對中國有貢獻,好似商台節目主持人陳志雲喺香港電台節目《星期三主場》嘅講法,咁樣係足以令西方起疑。

點解依家會提起 BNO 平權,呢件事其實有唔少點可以同 李振成 案一齊攞出嚟講,好多香港人都係貪著數,或者大中華膠發作,有BNO唔攞,有BC唔用,加拿大護照唔用,竟然用特區護照。喺過去廿年,BNO受歧視嘅情況下,仍然堅持用BNO,呢啲人其實已經完成拒絕中國嘅思想程序,而且係堅固嘅,咁點解英國唔可以俾呢啲BNO全面公民權,同樣道理,其實依家好多討論剝奪土共同港府官員嘅BC,特別BN(HK)A 1990嘅BC,呢個建議都係好大程度上係我嘅idea,其實我呢諗法係十分之南洋,如果你根本唔係效忠聯合王國多元民族嘅民主價值,只係因血統為理由效忠中國,呢啲人同 李振成 有乜分別,剝奪佢地英國國籍根本天公地道。

其實依家嘅世界大勢,唔再係血統主導嘅民族主義,所謂民族主義,就係利益一致嘅命運共同體,所以日本反對派領袖蓮舫係台灣血統,德國今日係一個多民族國家,唔只係再一血統國家,共同語言就係德文。法國就更加一早轉型為文化、語言民族主義國家,血統唔重要,最緊要你係講法文,熟法國歷史。香港亦應該係咁,香港就係一個共同用英文同粵語嘅共同體。甚至新加坡你話係英語國家,但大家都知Singlish混合粵、台、馬、印語文嘅部分,雖然新加坡推廣標準英語,但我相信Singlish係必要,因為佢係一個文化民族主義嘅標記。但如果仲係死硬做大中華膠,唔好意思,唔好話西方世界,香港人都應該主動掃呢班友出街,因為呢班友根本阻礙香港前進。

發表迴響

你的電子郵件位址並不會被公開。 必要欄位標記為 *