李光耀-故居-min

學 李光耀 ?何君堯 侮辱緊南洋人

本來想再講BNO同南生圍問題,只不過何君堯條hihi竟然話自己係受 李光耀 啟發「愛國愛港」就都嚟埋,作為南洋人後代,兼且係應該極少數可以喺新加坡報章評論當地內政嘅外籍人士,我無法認同 何君堯 嘅胡說八道。

李光耀 嘅成就係乜嘢

首先, 李光耀 一生最大嘅成就,係排除任何極端主義勢力,包括中共,馬來沙文主義,甚至係私會黨(黑社會),單係呢一點,何君堯已經無資格同 李光耀 相提並論,你或者未必認為 李光耀 嘅手段,但 李光耀 嘅手段終極目標係唔係建立一個王朝,而係喺南洋建立一個中道嘅西敏寺體制國家。所以我一直以嚟都十分尊敬 李光耀 ,甚至佢離世果陣,我企喺丹絨巴葛區嘅群眾之中。

同埋 李光耀 你可以話佢係大馬來西亞膠,但佢係拒絕種族主義馬來西亞,拒絕殖民嘅英國,亦拒絕中共嘅擴張,寧願建立獨立嘅新加坡共和國,一個實踐馬來西亞人馬來西亞理想嘅新加坡,都唔屈服,而且不惜代價,包括喺教育上、語文上同思想上斬斷南洋嘅大中華情意結。由英文教育,到電視劇《霧鎖南洋》都係目標一致。請問呢點同愛國愛港有乜X關係?甚至我呢個南洋人,一直係認自己英國人,連華僑呢個字都避免使用,呢個就真係受 李光耀 所啟發。所以對南洋人嚟講,特別熟知新加坡歷史嘅南洋人,何君堯嘅講法,簡直係侮辱晒啲南洋人。

如果認真去審視 李光耀 嘅一生同成就,一定唔係何君堯呢啲胡說八道, 李光耀 唔賣任何人嘅帳,佢只對新加坡負責,佢實踐南洋華人第三代甚至第四代對自己嘅要求同責任感,一種喺華人社會無咗好耐嘅騎士精神。所以 李光耀 至得到佢前宗主國,亦即係英國政壇普遍敬重,甚至容我咁講,如果佢遇上唔係六十年代仍然普遍有種族主義思想嘅英國,而係今日嘅英國,有 李光耀 才幹嘅華人,要成為英國首相都未必係一件奇事。

亦可以見到,何君堯呢個人真係不學無術,而且對其他國家嘅國民同歷史缺乏基本嘅尊重,點解土共咁乞我憎,多少亦同呢班友呢啲作風有關,你叫我去尊重呢啲土共,點尊重得落,佢地學吓尊重其他國家嘅歷史同文化先。

發表迴響

你的電子郵件位址並不會被公開。 必要欄位標記為 *