夏威夷-min

星期日休息: 夏威夷 錯發導彈警告:戰爭離我們好遠?

喺1月13日,有單嚇破全 夏威夷 島嘅事發生, 夏威夷 全島嘅手機突然收到導彈警告,仲要話唔係演習,喺38分鐘後至話係誤報。 夏威夷 州政府事後話係㩒錯掣,但呢個世界邊個咁多掣你㩒錯,呢單好唔尋常嘅事件,其實話俾大家聽,金正恩呢個黐線佬如果無人控制佢,其實戰爭離遠東區嘅人好近。甚至香港人,仲可以享受幾耐呢種紙醉金迷嘅生活,其實係一個好大嘅問號嚟。

夏威夷 一直係戰爭前線

喺美國嚟講,由二次大戰開始, 夏威夷 從來都係戰爭前線,日本攻擊美國就由 夏威夷 珍珠港開始,而如果美蘇真係開戰,唔計古巴嚟嘅導彈,阿拉斯加同 夏威夷 肯定係食導彈先。所以, 夏威夷 呢個導彈警告係唔係一個烏龍,我好有保留,因為好多內部軍事情報,得美國人自己知。只不過,有一點可肯定,依家北韓嘅狀況,其實係一個計時炸彈,唔係到侵總統玩小學雞,或者習近平繼續縱容呢啲黐線佬繼續亂嚟落去。

2010年3月5日,我喺新加坡《聯合早報》發表文章《中國應有秩序讓南北韓統一》,呢篇文章係我用戰略角度去分析北韓前途嘅文章,我當時提出嘅論點,我再簡單撮寫一次:

倘若朝鮮政權現在就崩潰,肯定不符中國最佳戰略利益,不論金氏政權孤注一擲與美國大打出手,導致大量難民湧入中國東北、中國黃海地區以及韓國,或是美韓聯軍迅速進駐朝鮮,對中國都沒有什麼好處。大量難民湧入中國東北,固然會使本來就為國內問題頭痛的北京當局更加頭大,金氏政權與美國大打出手,亦肯定導致大量難民湧入中國,甚至令中國難免捲入戰火。而沒有朝鮮金氏政權後的朝鮮半島,美軍將會直接與中國陸地接壤,令中國沒有任何條件使用武力對付台灣。

中國支持大韓民國旗下的朝鮮半島統一,應該是有利益可得才成,對中國最大的戰略恐懼,莫過於一旦朝鮮半島統一,美國軍隊可以沒有朝鮮的屏障下直指中國東北的問題,這也是毛澤東當年為何決定讓中國參與韓戰的原因。中國大可以參考芬蘭、奧地利模式,與美國、日本商談讓韓國統一後成為中立國,作為美日與中國之間的緩衝,換取支持朝鮮半島在大韓民國旗下統一。

對一個研究戰略同戰術嘅人,好容易會估到,如果北韓繼續黐線落去,將會出乜事,而2017年11月13日板門店休戰村,北韓士兵冒死南逃嘅事件,果位士兵嘅狀況,大家或者可以更容易判斷到依家出緊乜事。根據CNN International最近播嘅30分鐘特別紀錄片,有兩點特別要注意,雖然駐守板門店已經係北韓最精銳嘅士兵,但有以下兩個問題:

  1. 果位士兵已經七年無做過正規驗血,呢個對一個國家精銳部隊嚟講係絕對唔正常。
  2. 果位士兵被南韓醫生搶救期間,要喺佢體內攞出五十二條寄生蟲,其實一條長達三十厘米,果位醫生形容果啲寄生蟲係異形嚟。

咁大家諗吓,呢啲咁已經走入窮巷嘅情況,再咁落去,一係北韓好似東德咁崩潰,但東德嘅崩潰,某程度上係戈爾巴喬夫嘅戰略判斷嘅結果,就係任得東德共產黨自生自滅,東德周圍嘅國家任得東德人走向西德,東德共產黨成班友亂作一團,一個求X其嘅命令傳落去錯誤開放東西柏林邊境,跟住成個政權玩完。但中國無俄國佬咁好戰略判斷力,俄國佬見好就收,所以俄國佬無將奧地利分成東西,寧願做戰略中立地區,依家普京見到可以穩住敘利亞勢力,同克里米亞呑咗落肚,就任得烏克蘭東部班親俄派自生自滅一樣。中國係無呢個戰略理性,所以北韓會死撐,而香港甚至部分台商會被攞去陪葬,但仍然滿足唔到金正恩條黐線佬,最終仍然會係金正恩亂㩒導彈掣,或者特朗普決定要出兵打柒條肥佬,跟住中國要保住朝鮮呢個戰略緩衝區,同美日大打出手,跟住自己玩完,引發無序支爆,亦即係最惡劣嘅戰略情景,因為經濟支爆係有得走,至少可以有序咁走,而且有命保住,但戰爭引發無序支爆,可以乜後果都有,而且無序支爆,基本上可以連命都無,就算有命,如果你仲係中國公民,又唔似香港英籍人士果種情況,被人當敵國公民嚟看待,你諗吓二次大戰果陣嘅在美日本人,你就想像到係點嘅一回事,NHK嘅大河劇《山河燃燒》或者可以俾到香港人一啲啟發。

夏威夷 呢次導彈誤報,係一次黑天鵝事件,雖然戰略災難呢家嘢,要嚟嘅,遲早都要嚟。

發表迴響

你的電子郵件位址並不會被公開。 必要欄位標記為 *