鄭若驊-min

警方應該搵 鄭若驊 問話

鄭若驊 按揭文件漏報僭建,有可能構成詐騙罪,我呢個講法,幾乎我最先講,跟住由謝偉俊律師、陳淑莊大律師跟進,到工黨抄橋去報警,有啲人或者認為,按揭唔一定會講到僭建問題。其實買過樓嘅人都知,僭建呢個問題,你唔清理都唔駛旨意攞到按揭。

鄭若驊 明顯係有用不當手段取得貸款

我以前係做過按揭,買過樓嘅人,果陣買層樓,賣家有唔少僭建物,銀行代表律師同我果邊律師都有指出果啲僭建物一定要喺交易前清晒佢,否則係交易唔到(按揭批唔到,點磅水),督促賣方搞掂佢,因為有僭建物係會引發釘契,呢個法律後果係會影響銀行作為抵押品債權人嘅利益,湯家驊資深大律師話唔會因為有僭建而拒絕批出按揭,我唔知佢喺邊個星球爆出嚟呢種論調,但唔係我認識金管局嘅現行政策。

金管局係有監管政策手冊,去列明銀行接納邊啲抵押品,根據現行監管政策手冊3.1.1

認可機構可依法強制執行對該資產的收回權且不受阻礙;

我想問,僭建物有可能被釘契,呢個會影響認可機制強制執行變賣資產,我想問銀行憑乜批鄭若驊嘅按揭先,根據同一本手冊,3.1.2節

未能符合上述準則的抵押品仍有可能會被認可機構接納為對貸款的額外保障,但有關的貸款應被視作無抵押貸款處理

大佬,無抵押貸款,利息同樓按係兩碼子事,湯大狀要幫政府護航,都唔該做吓少少功課,如果渣打銀行批僭建物樓按俾一個一般市民,你諗渣打銀行班友會唔會被金管局照肺照到傻。呢個已經唔計有僭建物嘅物業,有可能因為僭建物清理而導致估值下跌,例如同一幢物業

有僭建,批出按揭金額:8,000,000
無僭建,批出按揭金額:9,500,000

當中果1,500,000差額就係明顯嘅金錢利益喇。一般市民咁玩都隨時上身兼出事(呢個亦係村屋交易風險比市區多層大廈要多嘅原因), 鄭若驊 係獨立屋兼涉及數以百萬計嘅利益,你覺得呢個唔係問題?

所以警方如果想挽回公信力,應該請 鄭若驊 問話,金管局亦應該做嘢,無理由粒聲都唔出,呢個係一個明顯不過嘅監管問題。林鄭月娥講得啱,有啲人係精英心態加雙重標準,不過係佢同佢自己啲老友。

發表迴響

你的電子郵件位址並不會被公開。 必要欄位標記為 *