海航集團-min

海航集團 可以死撐幾耐?

海航集團 一直喺度死撐,相信呢樣嘢本身都唔係新聞,只不過,喺中國現有走錢走到霸佔櫃員機嘅膠情況下, 海航集團 可以死撐幾耐,我真係抱有極大嘅疑問,甚至根本支爆係開始咗,成班香港人仲喺度懵盛盛乜都唔知。

海航集團 開始走小投資者數

其實睇番成個 海航集團 走數爆煲過程中,去百度貼吧就知乜事。喺11月21日,已經有人喺百度貼吧聚寶匯吧投訴, 海航集團 未有準時將到期嘅款項存入戶口,跟住引嚟華爾街日報駐中國記者追蹤,跟住大家至發現原來事態係嚴重。

海航集團-2-min
海航集團-2-min

依家 海航集團 係走細數唔走大數咁死撐,即係海航聚寶匯,或者HK Express之類嘅細數,會用一啲極其膠嘅方法拖住甚至走鬼咗佢,因為 海航集團 依家體型龐大,走呢啲細數比較唔覺,至少唔會好影響債務評級,一啲太細嘅default事件,好多評級機構都睇唔到或睇唔切,唔會好似一啲大數一走,就會即時變成CDS或其他相類工具嘅債權違約事件。 海航集團 呢班友,係有技術咁選擇性走數。

但中國嘅資金底弱就係弱,否則唔會有人連香港櫃員機走資呢啲咁Mr. Bean嘅方法都玩得出嚟,只要 海航集團 有一單重大嘅違約事件,就足以引發連鎖反應,特別依家 海航集團 體型咁龐大,而且隨時連西方國家都一併受到影響。所以美國以安全為理由,唔俾阿里巴巴旗下嘅螞蟻金服買專門做匯款嘅MoneyGram返嚟,因為馬雲買咗MoneyGram嚟做咩,真係無人會知。都係果句,侵總統講嘢係好小學雞,但佢呢啲江湖老奸巨,有啲古惑佢比聯儲局甚至國務院嘅官員睇得通透,奧巴馬年代,可能一早批咗馬雲呢單大deal喇,唔會等到依家至唔批。

好多人質疑支爆究竟會唔會嚟,定係變成一種slow burn,如果中國有日本嘅工業能力同內部消費市場,中國係有條件變成slow burn,只不過,都係果句,中國嘅工業能力同內部消費市場遠唔及上世紀八十年代嘅日本,所以一旦崩潰起嚟唔會講玩,我怕係中國一路死撐,一旦大崩潰出現,根本無人有時間去反應。

One thought on “海航集團 可以死撐幾耐?

發表迴響

你的電子郵件位址並不會被公開。 必要欄位標記為 *