大吉利是講句,如果發鈔銀行都執笠⋯⋯

如果早幾日,我同你講發鈔銀行都可能執笠,一係我被人當係黐線,一係我被人老屈不誠實使用電腦。

不過,英國政府宣布將標準渣打,同埋HSBC納入英國政府資本重整計劃,呢個問題大家要諗一諗。雖然標準渣打同埋HSBC都話無計劃用果筆政府注資,但HSBC同標準渣打嘅管理層,好明顯都唔敢賭一鋪,寧願入咗個plan穩陣啲,等到真係出事至搵政府打救,走都走唔切。

有兩個情況,香港市民同政府真係應該要諗可以點做:

1. 果兩間英國為總部嘅發鈔銀行,如果是但一間被英國政府接管,咁港幣點處理同安排?

2. 如果無英國政府作後盾嘅中國銀行(香港)出咗乜冬瓜豆腐,香港政府可以點?話中國政府都係頗強,但中國政府自已都要顧住中國人民幣同銀行系統嘅安全。

雷曼迷債擔保人執笠都搞到咁大鑊,如果發行鈔票嘅銀行出咗事,真係會膠到無朋友,唔通全香港市民周圍唱政府發行嘅十蚊膠幣,同埋硬幣喺日常生活?

當冰島都可以破產時,唔怕一萬,至怕萬一。

發表迴響

你的電子郵件位址並不會被公開。 必要欄位標記為 *