ECHR 係唔係對香港全無管轄權?

最近有單怪case,聽起嚟匪夷所思,照計果個唔係司法覆核理由,但其實有可能埋落政治炸彈。梁頌恆姑姐以DQ案有可能打上 ECHR 為理由,要求暫緩補選。表面聽起嚟, ECHR 邊有jurisdiction,聽落九唔搭八。但如果大家連香港憲政終極基礎:中英聯合聲明一併考慮,咁另計。

ECHR 與中英聯合聲明

有兩個情況,香港會同ECHR無關係:

  1. 香港人行使公投自決權利後獨立或離開英國,咁之後發生乜事都唔關 ECHR 事
  2. 英國唔再係歐洲人權公約嘅簽字國

問題係,英國要保留歐洲理事會(Council of Europe)成員,一定要簽 ECHR ,爭在要opt-out乜嘢條文,依家問題嚟,中英聯合聲明喺未經公投情況下,將香港主權交予中國,而英國仍然係歐洲人權公約簽字國,咁樣會否造成英國行為違反 ECHR ,呢一點要拗唔係無得拗,至少唔係完全不能入稟,因為呢個係簽字國對自己嘅國民違反人權嘅行為,唔計Protocol 4,英國有好多對香港British嘅責任,不論BNO定BC都無opt-out。英國對香港人權狀況不作為,都可能已經有可能構成一單可以呈上 ECHR 嘅案件,包括DQ議員呢單案,咁 ECHR 有無權力宣布中英聯合聲明違反歐洲人權公約而無效,呢個問題變得十分有趣。人權法院可以用單案九唔搭八為理由,唔受理,但亦可能宣在因中英聯合聲明英國係簽字國,所以可以作出介入,呢個係英治年代嘅香港從來未諗過可以玩成咁,屆時就完全唔同講法嘞。

所以依家好睇梁頌恆姑姐搵咗乜律師入紙打 ECHR ,我講明難度唔低,而且好大機會要先喺英國法院打,至有機會打去 ECHR ,但只要中英聯合聲明有可能會捲入ECHR,件事本身就已經膠到無朋友,畢竟呢一份係ECHR簽字國政府有份簽嘅國際協議,而呢份協議係送一班自己嘅國民俾一個獨裁國家統治,又未問過當地民眾公投,呢件事膠力唔比依家中國違反維也納條約法公約嚟得弱,甚至可能更膠,因為以我所知,香港人其實係捲咗入BREXIT風暴裡面自己都唔知。

我買定少量花生,睇吓有乜戲睇。

發表迴響

你的電子郵件位址並不會被公開。 必要欄位標記為 *