普教中-min

普教中 根本只會令細路閱讀力越嚟越差

根據香港大學嘅研究報告, 普教中 嘅細路,閱讀能力仲低過用香港語教中文嘅細路,教育局班人渣,唔知幾時可以取消 普教中 呢個白痴到無朋友嘅政策。雖然我自細已經識講華語,我叫做華語流利,但我都係反對 普教中 ,甚至根本應該用香港語寫作。

普教中 根本係邏輯混亂

由於現代大部分所謂中文文章,都係用基於華語語法嘅漢字嚟寫,所以啲人話細路中文唔掂因為用香港語學習中文,所以就要 普教中 ,但呢班大帝唔明真正嘅問題在於,所謂標準中文,根本對香港人嚟講都係外星語文,標準中文同香港語嘅文法差距,隨時大過德文同荷文之間嘅差距。你叫一個台灣人或中國人睇我呢度寫嘅嘢,有幾多個知道我寫緊乜,恐怕唔係太多,所以香港人根本係長期學習兩種外語,呢個正係閱讀能力有障礙嘅根本原因。

所以我嘅睇法激進好多,不單要儘快廢除 普教中 呢種垃圾殖民政策,而且應該係改學香港語文,即係以香港日常口語為基礎嘅書寫文字,如果要讀文學,除咗小說難搞啲,我寧願多讀文言文,以及好嘅歌詞好過,例如已故黃霑、林振強嘅歌詞,其實佢地對香港人嘅語文水準更加有營養。小說呢部分,可以先用香港本土嘅武俠小說等搭夠,直至香港有足夠嘅文學創作者為止,而唔係再讀五四新文化運動時期果堆不中不西嘅異種。

你叫我講華語,寫標準中文無問題,否則我唔會同時喺台灣、新加坡同香港三個國家嘅中文報章寫嘢,我將歐洲人多語文適應嘅做法,某程度上用咗喺遠東漢字系國家嘅環境度,而且係流暢熟練,但我唔會因為我可以寫流利華語,所以放棄香港嘅原生語文,以粵音及語法為本嘅香港語文。所以我對左膠文壇中人究竟有幾本土十分之懷疑,如果係堅持係真本土,點解唔用香港語文寫作至得。我到依家,都未見所謂文壇中人,係用香港語文寫作,難怪好多時香港文壇中人被人鄙視,甚至香港文學館嘅提議一直得唔到響應,梗係得唔到響應喇,你班友係唔係為真正嘅香港本土文學建館至得,香港本土文學有香港語同英語兩個方向都無人講喇。

我勸家長係, 普教中 係垃圾,係時候停咗佢。我可以講流利華語,都係咁講。

2 thoughts on “普教中 根本只會令細路閱讀力越嚟越差

  1. 我同意普教中根本係政治掛帥累細路,但唔同意「真本土點解唔用香港語文寫作」。正如台灣就算係民進黨執政都冇改用台語寫官方紀錄一樣,因為咁樣會亂晒大龍。華文雖然係接近華語/國語/普通話,但其實華文係獨立於語言,正如文言文獨立於各地語言一樣。所以北京既人雖然母語最接近普通話,都唔係出最多文學家。(當然同一道理就說明左,點解普教中唔會對作文有幫助。嶺南大把人唔識華語,一樣寫得好華文。)

  2. 樓上所言甚是,正如說德語的瑞士人在正式場合寫的德文應該很接近標準德文吧。
    「我手寫我口」不一定是好事。

發表迴響

你的電子郵件位址並不會被公開。 必要欄位標記為 *