Espresso

Espresso 機怪談在香港

林振強生前有篇文,話女人其中一樣最奇怪買嘅電器叫咖啡機。當然,我個人其實認為 Espresso 並唔係多餘電器,因為一部 Espresso 機可以抵抗地產霸權,嘆咖啡真係無必要去Starbucks呢啲昆水嘅地方。只不過,香港用 Espresso 好易壞係事實,因為啲代理同電器鋪,都係唔負責任,從來唔賣 Espresso 機必須嘅清潔劑:Descaler。

Espresso機 Descaler 香港難搵過登天

喺德國,啲水礦物質十分之豐富,基本上你買樽裝水,根本ARD啲節目嘅研究,其實成份同你水喉水無分別,所以德國人一般買Sodastream自己加氣入去,慳錢兼無咁嬲。啲水礦物質豐富,問題就係水裡面啲礦物積喺部 Espresso 喉管度,咁大家都知 Espresso 靠都係喉管同埋個泵製造高壓水,咁多礦物積喺水管度,唔壞就難。但德國 Espresso 陣亡率,遠遠少過香港。因為德國由雜貨店到電器鋪,全部有賣叫 Antikalker嘅清理藥水,即係一般講 Descaler 。你可以買生產商嘅配方,但買另一啲牌子其實都得。你聽聽話話每個月 descale 一次,基本上部機表現就一流,無乜問題發生,所以喺德國,咖啡機未陣亡過。

但香港就慘,你想照說明書講買descaler,一方面啲descaler貴到hihi,香港嘅價錢根本係唔合理,但唔合理都算,都要用㗎,更大問題係,果啲descaler成日無貨,無錯,無貨,你去豐澤、百老匯買唔到,你問dealer訂呀,等幾個月都未必有。結果你買比歐洲價錢貴好多嘅 espresso 機(果啲喺歐洲其實係cheap型號而已),用完幾個月就不幸陣亡,跟住你揼心口,然後乖乖繼續光顧Starbucks、甚至要資敵幫襯Pacific Coffee。

所以 Espresso 機喺香港,根本係怪談嚟,香港可以引進一啲歐洲式生活,但完全無相應嘅嘢跟住入嚟,香港呢個城市,真係離奇古怪得令人難以置信,香港人辛苦搵錢,真係唔知為啲乜。

發表迴響

你的電子郵件位址並不會被公開。 必要欄位標記為 *