校園欺凌-min

星期日休息: 校園欺凌 與教畜

香港最近發生一宗令人髮指令 校園欺凌 事件,有一個七歲細路被人塞擦膠,甚至被高年級學生欺凌,因為事件搞到要做手術入醫院,加上家長向傳媒投訴,大家至知,原來香港啲學校喺 校園欺凌 上面,可以搞到咁離譜。恕我直言,其實香港 校園欺凌 問題離譜咗好耐,甚至有部分根本同教師有關。

校園欺凌 與絕對權力

Lord Acton 有金句:Power tends to corrupt, and absolute power corrupts absolutely,不單適用喺政府,任何地方都一樣。而香港嘅學校,喺中國式儒家教師應當擁有絕對權威嘅影響下,有唔少成為絕對腐化嘅土皇帝,特別係操生殺大權嘅訓導主任,點解唔少家長咁熱衷於入家教會,因為喺家教會同啲教師熟,特別訓導主任、副校長一級嘅熟,佢嘅子弟喺學校係可以打橫行,當然呢啲家長係害死自己嘅子女,因為香港嘅公開考試尚廿算公平,基本上,呢啲叫教師寵臣喺公開考試上全部被KO,佢地出到嚟社會好多都唔知做乜。問題係,由於香港嘅教師好多嘢都唔受監管,結果有唔少人喺校方默許下大搞 校園欺凌 ,有幾多細路自殺或一生盡毀,根本上無從稽考。

香港嘅學校,基本好似唔駛守一啲基本人權規則,而教師,由小學到大學,都慣於或樂於使用佢嘅任意權力,如果遇上一啲真係有理想嘅人,或者唔會有問題,但遇上一啲為兩餐走去教書嘅人,呢啲人仲變態到失控。除咗 校園欺凌 ,香港教育界啲腐敗嘢,由校長可以攞住學校經費亂咁舞,到教師收教科書商嘅好處可以任意妄為,甚至有啲名校喺收生背後嘅權錢交換,大家仲嫌唔夠多,呢啲友仔,真係高登仔口中嘅教畜,你估教畜呢個咁難聽嘅花名,真係花崗岩爆出嚟。校本條例可以被土共有機可乘,都係打住要改革香港教育界呢種土皇帝局面嘅旗號,當然,大家都知道,依家只不過係變成另一班人渣,去對付一班人渣,我對異獸戰呢家嘢,一啲興趣都無,敵人嘅敵人唔代表真係朋友嚟。

當然,依家所謂校本條例根本不知所謂,喺美國,管教育嘅Education Board,有唔少地方委員都係民選,因為確保佢地嘅所作所為係向民意問責,唔係香港教育局,因為有個叫蔡若蓮嘅中共黨員做黨委書記,成個教育局變咗同共產黨問責,校本條例因而變成一條邪惡透頂嘅法律。最低限度,香港教育界應該有個人權憲章,除咗明確表明,類似國民教育之類嘢,或禁止學生發表港獨言論呢啲嘢係違反人權,校方可以被制裁,而且,教師某啲偏私行為,特別去到默許 校園欺凌 嘅地步,應該可以用公職人員行為失當嚟治罪。

點解我會用公職人員行為失當罪嚟理解,教師係公帑聘用人員,呢個好清楚,而公眾對教師係託付信任,去授予一定權力,酌情權和職責,以利其完成教育嘅工作,特別係處罰嘅權力,雖然學校沒收學生物品嘅權力,我認為法律上唔存在,根本只係搶劫嚟。但處罰,一定係一種權力,依家 校園欺凌 事件,可能係涉及有人未盡其職責,導致佢有負公眾嘅信任,點解唔係一種misconduct。如果要徹底解決 校園欺凌 問題,係唔係要廣泛引進公職人員行為失當嘅罪名,以刑事懲處呢啲搞到細路身心受創嘅幫凶,至叫做可以解決問題?

教育毫無疑問係崇高,但教師都係人,唔係聖人,唔好攞住疑似聖人光環,然後可以亂咁舞至得,當然,呢單 校園欺凌 案件,其實已經去到ABH嘅地步,係唔係要警方介入調查,我個人認為有必要。呢件事,我唔認為民事可以足以解決問題。教育界唔好同我講,你地做咗啲幾崇高嘅嘢,可以做嘢無皇管。講真,李飛演講果件事,大家可以睇到教育界呢班所謂嘅人,其實有幾私心重,而唔係真係佢地口中講到咁崇高。長遠嚟講,教育改革,唔係搞乜嘢國民教育,所謂教育民主化,亦唔係校本條例呢啲假民主化,例如容許家長自組學校(德國可以嘅),容許Home Schooling,甚至教育監管部門民主化,其實呢啲嘢係十分重要,香港嘅教育係好落後,落後就喺呢啲位。當然,成棚香港家長只係諗住送子女去外國算,但有幾多個有錢有能力去外國享受人地其實爭取已久嘅架構同福利至得。香港人真係太鍾意做free rider。

發表迴響

你的電子郵件位址並不會被公開。 必要欄位標記為 *