雷曼迷債各黨的表現

雷曼迷你債風波,結果甘乃威未報警,梁國雄己經帶住成班苦主去報警,仲要呢鋪係指控中銀訛騙,呢鋪真係考驗警方同香港現有商業法律掂唔掂。

不過回歸政治來看,呢鋪長毛同埋甘乃威大獲全勝,X建聯、豉油黨同公民黨輸到甩咗褲都唔知點解。

先講X建聯,X建聯班區議員樁腳扮到點幫苦主都好,無用嘅,呢鋪X建聯要對住中銀,你認為X建聯呢挺官商勾結黨,敢郁中銀一條毛?嘥氣喇,有涉及大商家,特別係長實、中銀呢挺級數,X建聯係無用,佢地最多係恰領匯攞彩咁解。豉油黨,更加唔駛講,影都無。

公民黨問題係一開始當雷曼苦主係傻嘅,後來至走去研究金融法例,行動慢人四五拍,依家係行動派政治家年代,你走得摩真係輸到甩褲。公民黨後來總算約到中銀,不過要等周一,蚊都瞓喇。佢地本來最強係法律,佢地傲慢嘅結果就係乜都無。我會勸公民黨,提升番自已對社會議題嘅行動速度。

社民連好多支持者,不明事理拒絕幫班雷曼苦主,但好彩長毛係夠醒,知道呢啲唔係鬧人鄭大奸果班貪錢怪,而係基層小市民被人呃積蓄。長毛一諗諗到要報警,好明顯知道成件事根本就係銀行做咗寶藥黨,That’s all。所以佢一知道成件事關鍵,行動極為迅速,迅雷不及掩耳,後來先上岸。做政客,一定要知道自已個位喺邊度。

甘乃威喺訛騙呢個問題度都慢咗少少,佢可以早少少打報警同訛騙法呢張牌,不過佢都明顯知道發生乜事,加上佢早幫果班苦主,所以佢呢仗奠定佢為民請命的江湖地位。

我呢度好少睇錯人,膠人定勁人,好容易判斷得出。

One thought on “雷曼迷債各黨的表現

  1. 此文乃持平之論。公文袋真冇改錯名,事事考據條文,不可救葯。

    題外話,貴blog訪客counter叫「來過的過客」,乃屬有d失禮的中文。過客,已指來過的客,未曾來過的客,難道還可以叫過客嗎?

發表迴響

你的電子郵件位址並不會被公開。 必要欄位標記為 *