邱吉爾-min

星期日休息: 邱吉爾 去咗邊?

世界越嚟越混亂,狂人一個個威脅世界嘅民主同和平果陣,今年有唔少以 邱吉爾 作為主題嘅電影。無錯,喺英國依家BREXIT搞到無人駕駛,美國亂咁嚟無定向風嘅時刻, 邱吉爾 益發令人懷念,令人不禁要問,當今之世, 邱吉爾 去咗邊。

邱吉爾 何時出頭

民主政治最大問題係,好多選民其實睇形象,唔係睇能力同決斷力,因為唔少有頭腦有決斷力嘅領袖係唔識包裝,如果唔係啲事情膠到膠無可膠,無法解決,選民孤注一擲,根本呢啲人無法上位。好似台北市長柯文哲,應該係近十年以嚟華人地區最口臭同最唔顧形象同脾氣嘅政客,派膠派得最多都應該係佢,但柯文哲上台嘅背景,其實係台北市政膠無可膠,再膠落去根本住唔到人,所以大家請柯文哲出嚟賭一鋪咁大把。當然,柯文哲不負眾望。

其實 邱吉爾 能夠成為首相嘅背景相當類似,其實 邱吉爾 好早已經警告全英國,希特拉係一件仆街,但英國人一直唔信希特拉堅係仆街,仲要係冚家鏟果隻,去到1938年,啲人都係覺得 邱吉爾 係黐線嘅,去到1939年9月佢入戰時內閣果陣,其實英國已經膠到無朋友,但仍然係張伯倫做首相,直至1940年5月,工黨已經對張伯倫嘅硬膠忍無可忍,邱吉爾雖然係保守黨人,但其實佢喺工黨支持下上台嘅,甚至當時英國保守黨好多人對邱吉爾抱有敵意,點解一個脾氣唔好,唔少膠事搞過出嚟嘅人,由佢出嚟領導英國出最黑暗嘅時刻。

其實呢個就係英國一直以嚟嘅問題,一個國家嘅國政,可以純粹靠一把不爛之舌可以搞掂,當然,邱吉爾文采極佳,佢係攞諾貝爾文學獎嘅,但領導國家可以純粹靠死剩把口嗎?當一個國家嘅民眾,承平已久,只睇形象唔識判斷當中內涵,或者將純粹包裝重口味,定內容都係重口味都搞唔清楚,就支持一個政客上台掌握國政,國家就會陷入危機。英國今日搞出BREXIT危機,其實就係同一個叫金馬倫嘅死剩把口嘅友仔有關,佢係又賭,又唔係又賭,佢口才無錯係一流,但留低俾英國乜嘢呢?我睇唔到留低咗乜嘢,反而Tony Blair,你覺得佢伊拉克戰爭講咗乜衰咗都好,但如果可以保持貝理雅年代嘅歐洲整合道路,英國可以持續改革落去,其實假以時日,喺歐洲,英國同德國、法國分庭抗禮並唔係無可能,但英國人就係因為眼前嘅短視,放棄咗貝理雅嘅正確路線,令人感到失望。

有人話Boris Johnson或者有可能係另一個 邱吉爾 ,Boris Johnson無錯文采都係一流,只不過,我睇唔到佢似邱吉爾, 邱吉爾 係有vision,佢睇到共產主義同納粹主義都係邪魔外道,佢睇到歐洲整合嘅前途同戰略,今日嘅歐盟其實某程度上包含咗 邱吉爾 嘅遠見。但Boris Johnson可以俾到人類社會,或者英國社會乜嘢vision,至少BREXIT以外,有乜vision適合英國?我完全睇唔到囉。今時今日,BREXIT嘅支持者,你提唔出一套英國嘅遠景同vision,更加唔可能有任何清晰嘅計劃,如果佢地有vision,點可能會搞到BREXIT依家好似無人駕駛一樣呢。

其實比較番南洋,李光耀當然都係文采好,但李光耀口臭同得罪人程度,相信南洋係佔歷史十大,只不過,無論左膠幾憎李光耀都好,點解李光耀奉為最偉大南洋人之一,佢嘅vision證明係正確,南洋唯一一個唔搞種族歧視嘅國家,成為南洋最強嘅國家,喺呢個年代,vision係最重要,擇善固執尤其重要,而且不惜代價。李光耀又好, 邱吉爾 又好,佢地堅持佢地嘅主張係at all cost。而依家,又有幾個領袖,會係不惜得罪全世界,有自己嘅vision。

你話依家世界嘅問題係乜,其實就係世上嘅庸人太多,所以遇上金正日、習近平、普京呢啲狂徒完全無辦法,大家以為可以同呢啲狂徒格食格嘅Trump,又唔似真係一個有決斷力嘅人,隨時佢自己都係其中一個狂徒嚟,跟住歐洲一堆領導人,可以好睇,但無法你相信呢班友係有vision扭轉大局。其實有咁多以 邱吉爾 為主題嘅電影出現,因為呢種情況,真係太令人感到焦慮不安,畢竟這會影響我們自身,甚至我們嘅下一代。(當然,港豬就由得佢繼續瞓吧)

(今次呢張相,係我返回自己國家期間喺首都國會廣場影嘅)

發表迴響

你的電子郵件位址並不會被公開。 必要欄位標記為 *