放假放到走唔切

我知唔少香港中產,呢幾日外遊散心,或者打算出發外遊。我估明天的股市大屠殺,佢地係走唔甩果批。

成班友以為美國實會通過救市方案,但事實上,美國好多人對投資界班福佳神憎鬼厭,反正佢地都斷供,遲爆不如早爆,所以傳媒點唱救市方案係大救星都好,美國選民猛叫政客唔好支持方案,國有化咗AIG已經夠晒皮。

仲有,Citigroup走去收購Wachovia銀行,更令美國公眾起疑心,乜Citigroup情況好好咩?Citigroup呢次行動,俾人感覺係想搞Too big to fail之嫌,搏美國政府救市方案救埋佢,咁你話眾議員點敢投支持票,個方案衰咗完全唔出奇。

如果你依家在海外外遊,最好搵搵你身邊有無HSBC Token或者call定你經紀自保都得,明日個市真係食速治靈都未必掂。

6 thoughts on “放假放到走唔切

  1. “777”在美國長期以來代表好運﹐但是在9月29日下午﹐這個數字代表著道瓊斯工業平均指數有史以來最大的單日下跌數字.

    共和黨長期相信自由市場經濟以及小政府不干預政策。今次這套救市方案形同全盤否定共和黨長期奉行的信念﹐試問有幾多人會輕易放棄﹖在美國中部的保守州份地區﹐當地的共和黨眾議員辦公室罕見地收到大量選民的電話﹐要求議國會員反對這項救市方案。認為這個方案只會是Wall Street(指金融業)同Main Street(指一般普羅階層)作對。今年又係大選年﹐除了總統大選之外﹐435個眾議院議席都要改選換屆﹐以及三份之一參議院議席都要改選﹔如果救市方案失敗﹐有任何冬瓜豆腐的話﹐這批國會議員點樣面對江東父老﹖政治生涯仲肯定玩完﹗﹗﹗

  2. 左右合流,美國人呢次都算似返人樣。

    用右派角度睇,救就係冇晒原則;用左派角度睇,唔救班友世間先至算係尚有公道 (某程度上 retributive justice)。如果過到關,都只係平日金融界啲茶煙飯酒+恐嚇有效咁解啫。

    宜家睇,應該係唔少共和黨人唔想執屎上身 (萬一McCain 贏咗,點算?),同埋乘機擺脫金融界班金主嘅箝制 (平日收佢哋太多油水,成日畀班「才俊」鍊住條頸),所以索性一棍打死算數。

    不過可惜,等同 A 貨版華爾街精神嘅「中環價值」,怕且一時三刻未有咁快跟住爆…唉。

  3. 老實講:

    1. 我唔認為七千億美金救到市,因為衍生工具製造係黑洞,唯一可以做係write off。

    2. 金融界班福佳係應該孭番佢地自己搞出嚟嘅蘇州屎。

    中環價值,依家中國停緊市,遲少少死喇,中國中央政府實托市托到底,不過中國都托唔掂果陣,大家自己諗喇。

發表迴響

你的電子郵件位址並不會被公開。 必要欄位標記為 *