鄺美雲

星期日休息: 鄺美雲 醜陋血統論

鄺美雲 作為一個擦中國鞋嘅所謂演藝人,支持國歌法唔出奇,但佢支持國歌法嘅理論,實在係種族主義兼偏離事實。佢喺梁粉《港人講地》講咗句:點樣唔一樣,你照下鏡,你係中國人。

我可以講,呢度有條友可以大大聲用香港語文同你鄺美雲呢個八婆講,我就係唔X係中國人果個香港人。我無喺呢度真係打個粗口字出嚟問候你祖宗,已經算係咁。

鄺美雲 擦鞋之前加多少少知識

首先,梁粉最鍾意講「一帶一路」,我作為南洋華人,就講吓南洋華人就係唔一定係中國人。一方面,根據1955年中國總理周恩來,與印尼當局簽訂嘅《中華人民共和國和印度尼西亞共和國關於雙重國籍問題的條約》,有一大批印尼華人就係唔係中國人,仲要係周恩來主動搞出嚟,之後新加坡、馬來西亞、菲律賓、越南、泰國嘅雙重國籍協定都係根據同一個邏輯。所以, 鄺美雲 話照鏡就係中國人,呢個論調係黐線。對中共嚟講,國籍同國歌一樣,係用嚟當龍門咁搬,鍾意專你政果陣,屈你係中國人,嫌你麻煩果陣,你就唔X係中國人。所以對於一個印尼華人嘅後代,中國人三個字真係難聽過粗口。相反,除咗我個英國公民同歐洲公民身份,根據啱啱由印尼總統佐科簽署嘅法令,我係有權申請海外印尼人社群卡(KMILN)嘅人,因為我係印尼公民嘅子女。我諗,我照鏡係唔會話到俾我聽係乜人。

而呢種純粹因血統、種族定國籍嘅講法,對德語區人民係最反感,德語區嚴格嚟講,有成五個,包括德國、奧地利、瑞士、列支敦士登同盧森堡,仲未計喺語言上都係近親國家嘅荷蘭、比利時,以及前荷蘭殖民地印尼,亦唔計喺意大利境內使用德語嘅省份。希特拉當初大舉出兵入侵其他德語國家,理由就係血濃於水四個字,所以先吞併奧地利,再揮軍進軍講德語多嘅捷克斯洛伐克蘇台德區,之後就係入侵盧森堡、荷蘭以及比利時,瑞士就係見到勢色唔對,立即武裝起嚟,講明德軍敢入嚟就打柒佢,有阿爾卑斯山天險保護,加上瑞士佬一早講到為咗自己嘅中立同自由,會搞到入侵嘅德軍焦頭爛額(有名嘅Operationsbefehl Nr. 10),希特拉左諗右諗都未知點搞掂同樣講德文,同樣追求精密,但又有唔少人講法文,充滿玩膠能力嘅瑞士佬,結果德國佬放棄。但亦因希特拉呢條友太令人反感,所以二次大戰後,德語區可以加強交流,例如有共同公共電視台(3sat同Phoneix,另外ORF2德國全境可以透過衛星收睇,奧地利亦可以收睇德國ARD旗下各台節目),一般賣嘢,德國、奧地利同瑞士係用同一款包裝,但如果要合併成同一個國家,唔好意思,呢個免問。德國同瑞士,甚至可以為咗追稅,同反追稅,互派間諜入對方國家。(無錯,派間諜唔係為軍事機密,係為咗稅,歐洲可以膠到呢個層面,中國人至會停留喺派間諜為咗偷人商業機密呢啲仆街層次)。

鄺美雲 又好,依家好多土共甚至中共本身都好,所謂統一嘅理論,就係赤裸裸嘅納粹理論,只要同一種族,就要服從同一個君主,呢個係黐線。我一直都認為,就算台灣係用中文,用漢字,用華語,都唔駛同中國統一,理由同奧地利唔會同德國統一一樣。奧地利個德文國名Österreich,實際意思係東方帝國,如果用中文邏輯,佢應該譯做東德,所以喺兩德分裂期間,德文對東德嘅提述,一般係DDR(民主德國),而唔係東德,因為一加埋Österreich入去,件事會十分之硬膠。奧地利係傳承哈布斯堡王朝一脈嘅德意志,比原本承傳自霍亨索倫(Hohenzollerns)王朝一脈嘅德意志,係優雅得多。所以奧地利依家一直係以文化上優雅精緻嘅一面,以及比德國更強調文化、藝術上嘅傳承,堅拒所謂德語系國家必須合一嘅怪論。所以,我一直都話,如果唔係有「南京」問題,用中華民國四個字都可以達致台灣獨立嘅目的,其實參考奧地利就明。甚至香港借大清帝國個殻上市,都可以達致香港獨立嘅目的,邊個話照鏡係乜族就要硬食要成為乜國家嘅人,你個國家啲人文化粗鄙不文,都可以係一個獨立嘅理由。

鄺美雲 嘅血統論,我只會用醜陋嚟形容,照鏡做中國人,呢個係納粹理論。納粹中國,應該仆街。

2 thoughts on “星期日休息: 鄺美雲 醜陋血統論

  1. “照下鏡,你係中國人”,這句話真係難聽過粗口。是不是中國人,不是其他人說的,只有當事人有權說!
    這句話,就如奴隸主說你就永遠是一個奴隸一樣,不要有幻想,就認命吧。
    生而為人,不是任何人說我是什麼東西,我就是什麼東西。
    最重要是自我認同。 這個稚兒園的問題,一次又一次給說出大 話洗腦,只要有正常思想,就是口不說,心中也會說這絕對是一句廢話。

發表迴響

你的電子郵件位址並不會被公開。 必要欄位標記為 *