金正恩

金正恩 發茅真係東亞大亂可期

好少我要搞到發香港時間清晨快報,但 金正恩 射導彈射到飛越日本上空,就真係唔同人咁品。 金正恩 突然射導彈飛越日本北部領空,落點據日本政府講,喺北海道以東千幾公里,喺俄佔千島群島以南,呢個絕對係一個挑機嘅落點, 金正恩 發茅真係東亞大亂可期。

金正恩 挑機本錢邊度嚟?

金正恩 呢個落點絕對係挑機,一方面飛越日本上空,迫日本同美國出手,呢一方面,落點喺千島群島以南,下次再射過啲,射咗過去阿留申群島海域附近,或者關島,Trump無可能唔打。仲要呢次,連普京都挑埋機,我相信俄國歷史,未有國家,包括美國會射到枝導彈咁近,否則大韓航空當年架波音747就唔會被蘇聯軍隊二話不說擊落。而呢枝係導彈嚟,就更加唔駛講。

但相信美國、日本以至南韓,最想知道依家 金正恩 挑機嘅技術,究竟係邊度嚟,好明顯,中國已經展現無力壓制北韓嘅格局,Trump係無可能再要對中國有任何退讓,因為中國擺明係走數。不過,我更相信北韓嘅導彈技術提供者,正係中國本身,烏克蘭依家親歐親美,唔會提供技術,俄國唔會提供技術,以色列都唔會,伊朗要提供技術未必有著數,畢竟依家喺打DAESH戰爭上,伊朗同美國係有共同敵人。以色列唔會做呢啲事,咁邊個國家有導彈技術可以提供到俾北韓?

而且 金正恩 咁發茅,中國並非無戰略合理性咁做,因為中國依家可以利用北韓嚟威脅日本﹐否則上次點解中國要反對南韓部署薩德導彈,本來薩德導彈就係防止 金正恩 發茅,但環球時報班友強烈反對薩德,原因卻係因為薩德阻止中國射導彈過日本,咁大家可以諗到,呢次 金正恩 發茅背後技術、燃料,甚至政治支持嚟自邊度,仲要最憎香港人嘅人大委員長張德江,就係金正日綜合大學經濟系出嚟,呢條友你覺得佢會親北韓,定係親美國呢?答案都好清楚。

金正恩 咁發茅,依家好明顯係一個有人擁有大殺傷武器嘅證據,因為證據係自己送上門,咁樣,Trump仲唔出手打柒 金正恩 ,全世界就會當美國係病貓,以Trump咁認叻,都睇唔會Trump由得佢亂嚟。總之,形勢明顯急變之中。

One thought on “金正恩 發茅真係東亞大亂可期

發表迴響

你的電子郵件位址並不會被公開。 必要欄位標記為 *