iqos

iQos 有乜問題?政府應該為減少二手煙批准進口先啱

最近海關拉咗個喺淘寶買 iQOS 煙彈嘅休班警,如果有人入未完稅,執法一視同仁係啱嘅。只不過,政府嘅煙草入口政策有無同樣一視同仁,我就好大嘅疑問。甚至 iQos 喺唔影響政府稅收政策嘅前提下,我唔明點解港府唔俾 iQos 完稅入口香港。

iQos 減少二手煙添,點解唔俾入

我唔係煙民,但對 iQos 嘅原理都幾知道,因為喺德國,食肆同酒吧仍然可以喺戶外煲煙,甚至歐盟嘅控煙法律其實無香港咁塔利班。 iQoS 唔係一般果啲用精油或者尼古丁油嘅液體, iQOs 都係用真煙草,只不過係將煙草加熱,而煙民吸入係煙草加熱咗造成嘅蒸汽,所以 iQos 雖然係用真煙草,但唔涉及任何煙草產品嘅燃燒,作為一個好憎二手煙嘅氣管敏感患者,都唔覺得 iQos 使用者呼出任何廢氣。而喺歐洲,係越嚟越多人吸 iQos 嘅煙,因為煙民繼續可以享受佢地成咗癮嘅香煙,但對公眾嘅影響甚少。至少空氣有嘅二手煙,將會少咗好多。

其實政府對電子煙政策咁模稜兩可,因為電子煙如果用精油,可能涉及稅收問題,政府唔知點向尼古丁精油呢種代用品徵稅,你估政府班友仔真係咁偉大維護公眾健康嘅咩,講嚟講去都係稅收至搵藉口反對電子煙。但依家 iQos 嘅煙彈既然係真煙草,咁用番現行嘅《應課稅品條例》都可以應付,我完全唔明點解公眾仲要偷偷摸摸去買 iQoS 或者 iQos 啲煙彈。只要海關有途徑俾消費者課稅,我睇唔到政府有乜合理理由,政府仲要唔俾 iQoS 入嚟香港,除非呢班衛生署官員都係真納粹,學希特拉啲衰嘢,自己扮晒唔食煙,但佢自己喺二次大戰期間,由take冰到take嗎啡都take到high晒。

我十分之想知道,政府對 iQos 或類似煙草加熱產品嘅立場,但如果政府係真心想減少二手煙嘅危害,政府應該做好自己嘅政策本分先,包括容許 iQos 或其他低排放嘅煙草加熱產品入口,以及喺唔同地方加設適合嘅吸煙專區或吸煙房,要吸二手煙就係呢啲吸煙專區或房去吸,唔係一味得個禁字,或者推埋啲85%核突煙包仲以為可以減少吸煙嘅自欺欺人政策。至於好似郭家麒醫生之流,香港醫生可能以為綁起晒啲煙民,就可以解決吸煙呢個公共衛生問題,好彩佢地唔係負責禁毒,否則香港一早變咗麥德林。

發表迴響

你的電子郵件位址並不會被公開。 必要欄位標記為 *