黃之鋒-min-3

黃之鋒 被判入獄喺德語區會引發大反彈

因 黃之鋒 等人被判入獄,不單引發司法信心大危機,更觸發超過十萬人大遊行,類似反《基本法》23條嘅勢隱然形成。如果你質疑遊行會唔會引發國際社會關注,可能因為你太著重睇英文傳媒。如果睇德語區傳媒,奧地利廣播公司(ORF),同德國公共廣播聯盟(ARD)屬下嘅德國電台(Deutschelandfunk)同每日新聞網站(Tagesschau.de)都顯著報導。大家可以諗到,呢次被 黃之鋒 入獄,根本係喺德語區引發相當大嘅反應,而香港人嘅反應,亦令德語地區民眾知道香港人仍在抵抗。

德語區何以關注 黃之鋒 入獄

喺德語區,公共廣播機構要抽篇幅報導香港新聞,本身並唔容易,因為德語地區新聞,唔興狗屎垃圾乜新聞都報一餐,Tagesschau每日就係五條新聞,德國電台都係類似風格。仲要突厥埃爾多安總統(定哈里發)濫用國際刑警組織Red Notice,令西班牙拉咗一位已經入籍德國,並無土耳其國籍,喺亞美尼亞大屠殺問題上同唔肯找數嘅突厥政府對著幹嘅左翼人士。呢件事係絕對會辣著成個德語區,喺咁嘅情況下,都仍然有篇幅報導香港嘅大遊行,你諗到德國人嘅關注。

德語區傳媒關注香港狀況,係同德國歷史有關,因為依家香港嘅處境,同柏林圍牆被打爛前嘅西柏林係一樣,對好多德國人嚟講,香港係遠東版嘅西柏林,佢地喺香港睇番幾十年前嘅東西柏林,所以香港呢個課題,唔單只係德國政府同歐盟嘅亞洲政策有關,對德語國家嘅民眾,佢地睇到一場相信自由嘅人,對住鐵幕包圍下嘅抵抗,因此,香港得到德國全國傳媒嘅關注。

所以德國聯邦人權專員,對上訴庭嘅判決作出極大抨擊,亦係可以預料得到嘅事嚟,因為對德語國家嚟講,香港雖然唔係德語系國家,只不過多啲香港人定居德語國家,但香港嘅情況,喺佢地嚟講,有歷史嘅投影喺度。(另一個係南韓,因為南北韓同東西德嘅相似性)。

所以日後香港嘅遊行,最好搵人整條德語橫額,等德國人可以睇到香港人嘅聲音,當然德語唔易學,但眼界唔應該只限英語世界。(法文都要架,呢點應請教Sony Chan)

發表迴響

你的電子郵件位址並不會被公開。 必要欄位標記為 *