林子健-釘-min

星期日休息:邊啲人喺度抹黑 林子健

林子健 被人用釘槍狂釘,本來應該得到同情,但竟然有人話佢係自編自導自演。本來自編自導自演嘅情節應該無人信,但竟然有唔少人信到十足,或者散播呢種言論,呢種現象就好值得大家認真探究一下,今日禮拜日嘅星期日休息,就剖析一下,邊啲蠢才或人渣,竟然認為 林子健 可以自編自導自演到呢個程度。

林子健 被抹黑後面係乜人?

當然,五毛係一定唔少得,大家仲記得林榮基出嚟做賭撚果刻,有人將林榮基啲私人生活攞晒出嚟,當然, 林子健 無私生活可以攞,唔通屈佢喺砵蘭街叫雞,呢招就真係低到一個點,所以就話 林子健 係苦肉計,特別中國人有啲人睇《三國演義》睇上腦,日本人睇《三國演義》就學曹操稱霸天下,但中國人睇《三國演義》,一係仲幻想劉備呢個漢室疏過唔疏嘅成員係正統,一係以為黃蓋苦肉計之類嘅計謀人人都用, 林子健 有乜理由要苦肉計到咁至得,無常識嘅人讀《三國演義》會走火入魔,所以,除咗啲五毛擺明無良心,有啲藍屍支持者,其實都係一啲缺乏常識同知識嘅人,你問呢啲人 林子健 喺呢件事攞到乜著數,成班友就會同你遊花園,因為佢地接受唔到自己確係如此愚蠢,自己支持緊啲乜嘢都唔知。香港好多所謂食鹽多過你食米嘅老人家,或社會「中流柢柱」,就係呢種級數嘅白痴嚟。

另一班五毛,就係熱狗, 林子健 記者會後,除咗五毛,第一班衝出嚟對付 林子健 就係熱城啲友仔,係鄭松泰為咗要扮係民主派,用熱血公民個朵去譴責中共,但熱城啲友仔嘅評論,十分之恐怖。當然,熱城啲主事人,係中共啲走狗,我相信有啲常識都會明,我唔妥 林子健 都好,大是大非要講啲乜,我都尚知何謂大義,但熱狗呢班友,有部分除咗係執行中共柯打,更恐怖係,有部分人一係對民主黨唔知點解有極強嘅私怨,民主黨係大中華膠雲集,但 林子健 當年係支持五區公投喎,咁點解要憎 林子健 呢位係某啲位上都係頗為有偈傾嘅人。當然,有部分熱城支持者最大問題係,領袖講乜佢講乜,話你佢有無邏輯。呢啲人,其實想返教會,只不過佢地返「政治教會」就變成咗一個災難咁解。

其實由 林子健 被抹黑嘅問題,大家可以睇到華人社會講政治最黑暗落後嘅地方,就係無常識,無邏輯,啲人嘅慣用思維方式,唔係一啲莫名其妙嘅陰謀論,就係純粹訴諸權威,攞權威講嘅嘢,當係自己嘅思想同主張。無論係果啲盲撐政府嘅的士司機,定凡事都要支持某個別領袖嘅熱城中人,都無一不如此,其實佢地對政治嘅狂熱,唔係基於他們關心社會,而係佢地想有個宗教信吓,同埋自己嘅言辭乏味,所以就要攞某啲人嘅金句去充撐場面。甚至香港有部分基督徒,係唔係真係將《聖經》教誨記於心中,定係佢地記住係某啲所謂宗教領袖自行詮釋嘅《聖經》話語,都係同一個原理,同一個問題。否則華人社會,就唔會咁多教徒明知社會不公不義都唔肯企出嚟,仲要喺壓迫人民嘅一邊。

呢種盲信權威嘅問題,華人社會由來已久,大家睇儒家喺中國出乜事就明,最初大家真係讀四書五經,如果純讀四書五經,各家各派自行詮釋還好,但元代之後,唔知邊個狗頭軍師諗到係只係讀朱熹嘅詮釋版本就得,真係窄到無朋友,結果科舉教出啲乜嘢狗屎垃圾出嚟,真係大家有眼見。其實呢個正正反映,華人社會傳統幾百年唔用大腦,唔講邏輯,只求權威,死背爛記嘅問題。結果真係面對大是大非果陣,既無道德,又無邏輯,只有權力同冷血,唔怪得啲人話,華人社會其實係十分之好管嘅。

消滅五毛,消滅熱狗,治標方法,梗係block人,report晒佢地啲假戶口,控制亂說八道散播,只不過,要治本嘅話,其實都係一個思維方式嘅改革,至少唔可以再係凡事訴諸權威,香港傳媒、香港嘅市民甚至政客凡事訴諸權威,不去用邏輯諗問題,我過去幾十年見得太多,同呢啲人辯論亦無道理可以講,唔通吓吓都要鐵血主導,強硬拗到對方啞咗至叫合理,但你係改唔到呢啲人唔用腦思考問題嘅問題。老一代,我救唔到,甚至醫番嘥藥費,但果啲熱城信眾,唔少係年青人,如果可以救得一個,都算得上係功德,雖然由部分人嘅往績嚟睇,能夠成功救到佢地嘅機會唔大,有啲OS問題嘅死症,無你諗得咁易patch嘅。

發表迴響

你的電子郵件位址並不會被公開。 必要欄位標記為 *