皇冠車行-min

皇冠車行 特別神通廣大:點解可以咁早批19座出牌

運輸署特別優待 皇冠車行 ,呢個係對小巴略有理解都知嘅陰謀論,因為豐田驗車次次都okay,但其他公司要驗車,遇到嘅刁難你係估唔到,運輸署驗車組班友好似同其他車行有仇咁。只不過,小巴19座位法案呢件事,就更加反映 皇冠車行 嘅問題大到,係唔係必須要交俾廉政公署跟進。

皇冠車行 點解可以打尖?

一般嚟講,無論19座現有舊車加座位,定出新車,運輸署都要出過type approval。中國金旅之前驗車都驗到有人火都嚟,不過運輸署可以用中國車要小心啲辯護,但對三菱果批車,我聽到嘅版本係:

  1. 喺小巴加座位法案三讀通過果日入紙,運輸署話要7月7日(刊憲日)至可以入紙
  2. 現有舊車,唔理隻門點都一次過驗,運輸署要按唔同嘅門,唔同嘅引擎,分開驗。

金旅架新車,喺全民幾乎要媽爆嘅情況下,以我所知已經過咗type approval出牌,但金旅架新車係早喺今年一月申請,用咗半年。依家豐田有石油氣車,有柴油車,應該涉及六七個applications,依家一個月唔到可以舊車即加座位驗車,一係 皇冠車行 偷步入紙,運輸署批,一係運輸署異常厚待豐田,令其他車商受不公平對待,但兩單嘢,都係應該要廉署跟進,因為無論理由係邊一個,都好明顯係公職人員行為失當,點解運輸署驗車組班友唔駛去廉政公署飲咖啡?

其實成個19座位安排,都係匪夷所思,的士佬我幾懷疑幫 皇冠車行 食咗隻大死貓,因為真正要19座位係 皇冠車行 ,19座位係 皇冠車行旗下所賣車種座位嘅上限嚟,係唔係因為要遷就 皇冠車行 賣嘅車,所以至無理咁樣搞出19座位嘅限制,喺紅小都唔想加座位嘅情況下,綠小加四隻位真係咁影響的士生意?其實大家用常識諗都知。再加上依家 皇冠車行 異於尋常,一個月內搞掂晒type approval嘅程序,我作為行外人,我十分之希望運輸署俾番市民一個清晰嘅交代。特別呢種厚待單一車行嘅情況,嚴重影響市民以及營辦商,點解營辦商要被迫俾單一公司打劫。依家 皇冠車行 聲稱收到嘅300張單,係唔係政府有特殊政策益佢地。

香港真係沒有最醜惡,只有更醜惡。

發表迴響

你的電子郵件位址並不會被公開。 必要欄位標記為 *