劏人由iBank開始

受到環球經濟影響,匯豐控股 全球裁員1,100人,其中100名是香港員工。被裁的100名匯豐本港員工,主要來自環球銀行及資本市場部,當中亦有資訊科技部的員工,大部分負責後勤工作,屬於合約性質,昨日開始陸續收到通知。

對銀行運作有認知嘅,就知呢鋪HSBC全球炒嘅,係iBank連Back Office班友(IT部多少係受Back Office都炒埋連累)。

好多Back Office或iBank嘅約,係逐個月逐個月咁續,之後逐半年逐半年續,而且衰到搵MANPOWER之類嘅公司名義請住先,方便cut head count,只得一部分人真係以永久員工身份請。所以合約制嘅第一批起身,兼且由iBank開始,估都估到。

好多銀行話無裁員計劃,你聽住先好喇,越係大間,越係做iBank嘅行,劏人劏得越嚴重。我一個月前已經講,寒流已經嚟緊,經歷過AIG被國有化、雷曼執笠等膠事,班iBank佬會搵中層同細嘅開刀,高層繼續有佢地洗腳唔抹腳,兼唔負責任咁做決策。

至於工聯會屬下嘅銀行業僱員協會,好心佢地唔好做騷啦,如果中國銀行(香港)、工商銀行(亞洲)等嚟鋪大屠殺,佢地會唔會出嚟示威,要求阿爺擁有嘅銀行負起社會責任?真係正宗大隻講。

延伸閱讀:
黃世澤:準備好寒流襲港未?

發表迴響

你的電子郵件位址並不會被公開。 必要欄位標記為 *