Dunkirk-2-min

星期日休息:香港人嘅 Dunkirk :應為乜移民

呢排期最受討論,應該係Christopter Nolan嘅 Dunkirk ,當年英國人嘅大撤退,喺英國人角度,當然極英雄,喺戰略角度, Dunkirk 亦好成功,但戰術執行角度,呢次要平民冒險,幾乎連屋企個浴缸都拆去英倫海峽嘅行動,睇落係十分之騎呢。大佬,平民啲遊艇對住係德國國防軍嘅襲擊。

香港人嘅 Dunkirk 係乜

比起Operation Hannibal,德軍已經被人打剩一堆老弱殘兵,幾國圍抽德國嘅情況下,仍然可以執行將幾百萬東普魯士、波蘭、波羅的海三國嘅軍民撤到德國西部,雖然無法避免Königsberg被攻陷後令人髮指嘅情況,但至少係正式德國軍方執行嘅行動。只不過,當你要保存有生力量嘅時候,幾騎呢嘅行動都要做。而依家,正係香港人要思考嘅情況。

同香港上世紀嘅大移民潮唔同係,上一代嘅香港人,只係好簡單恐懼共產黨,但本身無一套好鞏固嘅理念同共產黨對抗,加上香港一直以嚟對國家認同嘅理念極度混亂,好難同南洋新加坡建立果陣相提並論,所以出現一大堆攞住西方國家護照,最後返嚟香港搵食後同中共合謀嘅仆街,如果呢種大撤退,我寧願唔好退。所以我唔會開移民顧問公司,相反,我提供資訊都要審查,其實有呢方面嘅考量。

依家中國已經喺支爆前嘅大暴走,一係遲早喺南海或台灣大打出手,一係就因為經濟大爆破,而內部一片混亂,我睇唔到有類似蘇聯庶近和平解體嘅可能性,相反,最可能嘅解體方式,係南斯拉夫式解體,好彩嘅,好似斯洛文尼亞咁,打幾日象徵式嘅仗後和平分手,唔好彩嘅,最差嘅情況,就係科索沃、波斯尼亞果隻殺戮戰場,屆時就真係獨立成功都嘥藥費。所以,如果有下一代嘅,香港人係應該認真考慮依家就撤退嘅問題,保全有生力量,為未來嘅香港人國家鋪路,呢個就係呢次大撤退嘅重點。上一代果種,賺完錢就由得香港變廢址拍拍屁股走人嘅做法,根本係不負責任。喺海外同中共合作嘅華人,包括唔少香港人,日後佢地嘅西方國家國籍,係應該剝奪,並且遣回中國。

我嘅睇法,係香港大概呢一兩年,就要完成保存有生力量嘅撤退,並且喺撤退之後,呢班遺民以保存香港語言、香港價值觀之餘,接受居住地國家嘅價值為宗旨。依家二十歲以下嘅年青人,係應該首要撤離嘅對象,因為佢地唔值得變成香港嘅陪葬品,而亦要細細個,就要教導佢地,尊重同認同現居國家嘅同時,可以支持香港復國,都盡量要做,不論任何方面,由游說政客、參與當地軍隊、營商發達再捐錢搞革命,乜都好。甚至喺海外打工嘅經驗,都不失為未來嘅準備,例如為未來香港重建工業,或為未來香港商業網絡建設做準備。

當然,我睇呢次 Dunkirk 大撤退,實際執行者,唔會再係加拿大,或者澳洲政府,而係英國同歐盟,一方面,依家英國要重建遠東影響力,除咗攞番香港,根本無其他選項俾英國選擇,依家咁嘅體質嘅英國BREXIT,再想搵番加、澳、紐等國去幫拖,我睇會被人嚴重鄙視,某程度上,英國都要證明佢地仲有少少實力至得。而歐洲由於文化因素,文化根柢遠比澳、紐、加等本身係移民國家為厚,中共第五縱隊唔容易借香港移民社區滲透和壯大,而歐盟國家現時亦對香港情況十分之清楚,特別係德國同法國,德法兩國國民其實對香港情況瞭如指掌。所以,由歐盟作為終點亦順理成章。

最後香港人返唔返到嚟,或者幾時返到嚟,其實一切都要睇呢班香港遺民嘅戰略,同集體智慧,當然我略為悲觀,因為香港總有一啲自私自利嘅人,為咗一已私利而將成個撤退基地搞爛,呢種事情喺華人社會見得太多。只能咁講,香港人嘅命運,如果不至於淪亡,可能仲需要有一個類似戴高樂將軍嘅人領導嘅運氣。正如法國喺二次大戰爆發前都係膠到無朋友,現代法國人之所以感激戴高樂,因為無戴高樂,法國呢個硬膠國家可以一早已經唔存在。同樣係膠國,點解中華民國喺二次大戰果陣無法以自己力量光復首都,但法國人係戴高樂自己入番去凱旋門,呢個歷史偶然至關重要。最好香港唔好咁多自稱第一健筆嘅膠人。

後話:鑒於依家俄國根本係一個野蠻國家,我寧願Königsberg回歸德國,當然普京唔會咁做,但一旦俄國勢弱,係一定要同俄國呢個國家清算。呢一點,我同陶傑睇法唔同。一個唔尊重歐洲民主共識嘅沙皇,都唔會對西方文明帶嚟任何好處。

發表迴響

你的電子郵件位址並不會被公開。 必要欄位標記為 *