小巴-驗車主任-min

審計署應該好好審計一下 驗車主任 平日做嘢方式

話說運輸署啲 驗車主任 ,一向都為各界所詬病。只不過,為咗改善公共交通服務同香港空氣質素, 驗車主任 編制都係要擴大嘅。喺2015年財委會會議上,用咗每年一百八十萬公帑,額外請總機電工程師職位一個,以及加一位首席EO做秘書。照計加咗位後,應該好有效率架,至少小巴加座位,嚟緊九月應該有咗座位嘅車坐啩。但以我收到嘅料,唔係囉。

驗車主任 做嘢方式玩殘全世界

照政府2015年嘅paper,如果請呢位總機電工程師,係要將香港嘅車輛規格標準追上世界潮流,同埋令工作流程加快,咁好好喇。但如今,香港啲車輛標準,仍然係一啲古靈精怪標準,好多歐盟同日本已經更新嘅標準,香港都無跟。但更膠嘅事情,發生喺小巴加座位上面。

話說唔少長陣小巴,本身就係可以容納19座位,咁照計,只要將原本符合規格嘅座位,加番上去就係,只要係同一車型,用番合符歐盟規格要求嘅座位,再做一次測試,咁就應該實食無黐牙。但運吉署班官,可以點樣玩你,玩到你謝為止:

  1. 石油氣小巴-新車
  2. 石油氣小巴-舊車
  3. 柴油小巴-新車
  4. 柴油小巴-舊車

即係你要加座位,你要重複驗四次,even石油氣同柴油小巴嘅底盤,只係有引擎上嘅分別,而無構造上嘅分別,而新車同舊車無構造上嘅分別,都要分開咁驗,縱使新加上去嘅座位,根本係現有沿用座位同一型號。咁樣,車廠同小巴公司,就要準備四份內容大部分一樣,但由頭做過一次嘅申請。呢啲吹漲到爆嘅事情,令到好多小巴公司同車廠好困擾。咁唔怪得啲Euro 6車等等,可能等到天荒地老,都未必可以投入行駛。原來市民未感受到小巴加座位嘅好處,多得運吉署呢班混帳官員。

我依家想問幾個問題:

  1. 2015年財委會批准請嘅官員,請到未?
  2. 如果未請到?點解?
  3. 如果請到嘅話,可唔可以解釋吓呢條友過去幾年做咗乜?

由2005年到依家,審計署好耐未審計過運吉署班驗車大帝,呢班大帝啲做嘢手法,已經引起好多人質疑,既然12年都未審計過,好應該衡工量值審計一下運輸署做type approval果陣啲黐線程序。呢班友日日收香港人錢玩香港人,幾時可以呢班冚家鏟可以玩完?

發表迴響

你的電子郵件位址並不會被公開。 必要欄位標記為 *