100毛-min

100毛 上市:真係值呢個錢?

100毛 向聯交所主板上市,唔係創仔。主板係要有3年賺錢要求至過到,當然, 100毛 係唔係真係上到市,依家都言之尚早,因為你見hkexnews嘅上市申請文件,都唔代表會批到上市,好多時,港交所上市科,同埋證監都會審條數,林日曦幾時做到上市公司主席,或者東方昇著住北韓裝束主持開市開鑼儀式,都係言之尚早。但 100毛 盤數係唔係值得投資,我係略有保留。

100毛 攞住最風光盤數嚟上市

其實 100毛 值唔值呢個錢,除咗睇年報,對做social media嘅人,數佢有幾多likes,幾多share,幾多特約轉載,再估個市價係估到。依家 100毛 係攞2015, 2016年盤數嚟上市,簡單嚟講,係 100毛 最風光果陣,由派獎典禮,到黎明果啲廣告,全部都有一定數圍嘅。加上 100毛 本身算係身兼廣告公司角色嘅怪物,所以幾千萬純利,驟眼睇落嚟係合理,至少反映到 100毛 喺香港social media呢舊餅嘅分成。

有人會質疑點解舊餅睇落更大嘅壹傳媒點解賺唔到錢,恕我直言,壹傳媒嘅人事架構大好多,廢人多好多,高層成棚都係茂利,再加上印刷部分印一份蝕一份,本身又唔會做埋廣告製作呢部分,所以蝕錢係合理,呢個仲未計, 100毛 對個別artist嘅處置,我並唔認為十分之合理。而 100毛 印刷果部分,基本上唔叫存在,有幾多人會買本 100毛 嚟睇,咁有米買 100毛 嚟睇,不如俾吓錢我,或者睇下膠事錄好過,膠事錄係原創嘅,大家要記住, 100毛 係抄咗人唔找數嘅。

當然 100毛 依家有無得再上,我有保留,大家近排有share幾多 100毛 或者毛記電視嘅post?而且一旦上咗市,未必可以玩到咁盡,你睇吓壹傳媒最終要壯士斷臂賣壹週刊,唔係直情執咗佢,當中理由都係因為壹傳媒係上市公司,黃浩屹個頭出嚟買,願意幫幕後金主做傻仔,唔通你唔買,雖然我都估到個幕後金主有機會係同買有線果班友係同一黨。 100毛 可能最終被啲大財團買都唔奇,因為佢上咗市。喺法國,你見玩膠玩到編輯部人員命都無嘅 Charlie Hebdo (查理周刊),或者爆料超強嘅鴨鳴報 (Le Canard enchaîné) 會上市未?

發表迴響

你的電子郵件位址並不會被公開。 必要欄位標記為 *