新土地法-澳門立法會-min

澳門式立法會係好嘢?搞出 新土地法 之類怪物你唔好怨

澳門式立法會,相信係唔少商界人士夢寐以求,因為好多立法會會好易咗好多。最近新澳門學社嘅吳國昌,為劉曉波發聲,澳門立法會竟然想黐線到搞規例禁止發言果陣用道具。呢種議會係唔係好事,相信唔係個個好似田北俊咁心水清。如果搞出 新土地法 之類怪物,唔好怨人。

澳門議會失衡搞出 新土地法

雖然香港泛民都有好多左膠,只不過,如果啲法律太侵犯私有產權,特別好可能違反法治原則,自由黨加公民黨同民主黨聯合,都可以KO相關法案,係經民聯啲人至咁傻,乜事都係跟足中聯辦啲友仔指揮。但澳門係,基本上澳門特區政府提乜法案,都極大機會予以通過,商界議員想拉埋民主派少數議員拉倒一個法案都唔可能,結果依家咪搞出《新土地法》呢個蘇州屎出嚟,當然,澳門民主派本身對 新土地法 嘅立場我都係抱持唔同嘅意見,但無論如何,議員發言權利,無論對邊一派都好,都係需要絕對嘅保障,否則任何幾唔合理嘅立法都無力制止果陣,要事後再補救係會好麻煩,你睇依家中國高鐵香港段搞到一鑊粥,就明乜事。

所以一個正常嘅議會應該係乜,議員發言,除非出現十分之「非議會語言」,好似英國Dennis Skinner MP果款(Dennis Skinner MP把口有幾毒,大家都好清楚明白嘅,例如佢被趕出議會果次,佢叫人做dodgy Dave,賣首相金馬倫係賣假貨嘅hihi,比臭罌出臭草更口臭),否則要盡量捍衛任何議員嘅言論自由,否則幾離譜嘅立法都會過到,下一步就會收埋你嘅家產,屆時真係喊都無謂。澳門本來個議會結構已經好有問題,又保留委任議員,又有乜嘢社團間選議員,跟住立法會直選個比例代表制,又好似歐陸咁拆成九十幾張名單參選,得果四個民主派議員,所以澳門過到《基本法》23條,又搞出好似《新土地法》呢啲沒收小業主財產嘅立法,又咪係咁解囉。

香港商界議員最大問題係,無幾個有李鵬飛同田北俊呢啲政治遠見,好多人嘅政治視野都十分之淺窄,有啲好似陳健波之流,仲以為有得分,要限制議員發言,亂咁剪布,睇幾時輪到佢地瀨鑊甘。

發表迴響

你的電子郵件位址並不會被公開。 必要欄位標記為 *