劉曉波-美斯-min

劉曉波 美斯 巴塞隆那 加泰隆尼亞

民主黨林子健走去寫信俾巴塞隆那,代劉曉波攞張 美斯 簽名相,其實好多歐洲球隊都未必會做,但 美斯 唔怕中共壓力,簽咗張簽名相,並希望林子健代寄俾劉霞。其他歐洲球隊或者會怕中共,但我唔識足球都知,巴塞隆那隊傳統上,會同異見人士同一陣線,呢個同佛朗哥法西斯統治期間有關。

美斯 肯簽名後面嘅歷史

大家都知巴塞隆那係de facto嘅加泰隆尼亞國家隊,香港獨派嘅口號Hong Kong is not China就係Catalonia is not Spain嘅遠東版本嚟。而喺佛朗哥呢位法西斯主義分子擊敗左翼共和國成為大獨裁者前,巴塞隆那同加泰隆尼亞係共和派最後堡壘,所以佛朗哥唔單只打壓加泰隆尼亞語,更加打壓巴塞隆那隊,巴塞隆那隊一直受壓至1975年佛朗哥逝世,國王Juan Carlos I恢復君主立憲體制,1977年西班牙舉行民主選舉,還政於民,而對巴塞隆那隊嘅打壓,亦喺果陣結束。亦因為呢段歷史背景,巴塞隆那對皇家馬德里或者愛斯賓奴嘅賽事,通常都好有政治色彩,亦都係咁解(愛斯賓奴根本係佛朗哥搞出嚟,搵埋成棚支持佢嘅巴塞隆那人搞巴塞隆那隊)。

亦因為呢段歷史,所以去到今時今日,喺呢啲對抗法西斯嘅場合,巴塞隆那隊寧願唔理中國市場,一方面,依家中國政府根本係一個衰過晒佛朗哥嘅納粹政權,好難幫得落去,另一方面,巴塞隆那亦係一個「實際上」嘅加泰隆尼亞國家隊,中國同西班牙成日都係打壓地方自決運動,點解你理你中國嘅感受?相反,加泰隆尼亞同香港、台灣、蘇格蘭、巴斯克甚至東突厥嘅獨立運動,都係意識形態上嘅盟友,所以 美斯 幫劉曉波簽名,對球隊嚟講,政治意義反而更加重要。巴塞隆那係多多錢都買唔到嘅球隊,你估意大利啲球隊,可以俾啲自認we are so rich嘅茂利買落嚟。

當然,喺歐洲傳統上,劉曉波係諾貝爾和平獎得主, 美斯 替其簽名,亦係榮幸。但歐洲球壇向錢看嘅今天,巴塞隆那隊維持住抵抗佛朗哥統治以嚟嘅傳統,呢個係十分之難能可貴。巴塞隆那隊喺球場上嘅「演技」,你未必欣賞,但簽名俾劉曉波,就唔係演戲,而係巴塞隆那嘅歷史傳統。

發表迴響

你的電子郵件位址並不會被公開。 必要欄位標記為 *