海航集團-1-min

海航集團 缺水可能引發香港地產大瀉

海航集團 缺水,雖然已經係一件好明顯不過嘅事實,只不過,好多人都未意識到,除咗香港航空同香港快運營運到亂七八糟外, 海航集團 可以有幾大件事。依家Bloomberg報導,中國啲國有銀行唔再借錢俾 海航集團 ,再加上有29%嘅 海航集團 股權轉移到以美國為基地嘅一個基金度,成件事,其實對香港人係好明顯嘅警號,如果大家仲認為中國經濟好掂嘅話,我睇怕喺中共十九大前後,中國經濟已經攬炒到不似人形。

海航集團 缺水可以幾大鑊

海航集團 缺水,香港航空同香港快運啲機票,隨時會凍過冰,喺呢個時候,買咗機票嘅,固然應該要買旅遊保險,但香港好多人都唔買 海航集團 旗下航空公司嘅機票,咁對一般香港人有乜影響,莫過於 海航集團 喺啟德買嘅四塊地。

大家想像一下,依家 海航集團 用咗二百億港紙,投到成四塊地,總樓面面積二百萬平方呎,如果 海航集團 真係要撲水賣地,或者因為銀行找唔到數,要賤價賣地,大家諗吓有乜結果會發生,屆時啟德啲樓價仲唔暴跌,一旦引發連鎖反應,你覺得香港啲樓市會有得剩,只要諗到呢樣嘢,都足夠令你無法對香港嘅經濟前景有任何樂觀嘅理由,呢個仲未計,其他中國財團會唔會都好似 海航集團 咁,同樣要撲水,因此大規模賤賣手上用唔合理高價買返嚟嘅資產。

只不過,黐線嘅事,喺香港嘅銀行度,我依家極粗略分析一下,香港各大銀行為啟德項目,借咗幾多錢俾 海航集團

銀行 抵押物 金額(港幣)
東亞銀行 啟德1K區3號 35億
上海商業銀行 啟德1L區1號 26億
星展銀行 啟德1L區2號 22億

我未計 海航集團 借香港航空同香港快運個朵,抵押飛機嚟借嘅錢,同埋依家 海航集團 係德意志銀行大股東,但德國政府已經開鑊要查,同埋德意志銀行本身,就係全世界最大風險來源,大家諗吓一爆起嚟,我真係唔敢估會發生乜嘢事。

我五月已經講過,依家 海航集團 以至成個中國嘅風險系數係極高,但似乎好多香港人都意識唔到核彈將爆,如果你呢幾個月入咗市樓市,我只能祝你好運,至於揸住銀行股果啲,我個人嘅建議係你快啲沽咗佢。

利申:我無持有任何銀行股票。

One thought on “海航集團 缺水可能引發香港地產大瀉

  1. 世澤兄:

    如果德意志銀行有鑊爆, 咁德國呢個歐盟揸 fit 人會唔會有事呢?
    對中共全無提防之心嘅揸 fit 人, 食屎係意料之中, 係應該, 係好簡單明瞭嘅因果報應.

    英國如果唔脫歐盟, 咁同德國一齊食吓屎都好嘅, 話唔定, 食食吓, 可以食出個樂趣來呢.
    話時話, 法蘭克福真係地靈人傑, 有幾大金融公司開曬聲話要由倫敦遷冊過去, wow, 真知灼見也.

發表迴響

你的電子郵件位址並不會被公開。 必要欄位標記為 *