香港快運-min

坐得 香港快運 都係買定旅遊保險好

喺美國銀行都話因KYC問題,同海航集團拒絕交易後,海航系旗下公司嘅膠事越嚟越多,最經典係 香港快運 話因流感理由取消航班都得,其實如果知道海航系依家嘅處境嘅話,都大概估到流感呢個根本唔係理由,真正嘅理由,應該係另一樣嘢。

香港快運 找唔到數?

機票之所以貴,因為你要一班機成功起飛,有好多費用要俾嘅,唔計空姐同機師人工,仲有以下費用:

  1. 降落費(按重量計)
  2. 登機橋使用費
  3. 候機室使用費
  4. 地勤費用
  5. 保安費用
  6. 飛機餐費用
  7. 行李設施使用費用
  8. ATC費用(途經每一個FIR嘅ATC都要磅水嘅)
  9. 燃料費用
  10. 飛機維修費用

當然,我以上列表係好粗略咁列出嚟,但呢度每一筆嘅費用,一係有條credit line找數,依家海航集團根本過唔到KYC,一係現金過數,一係就唔駛找數,無找數,咁點可能飛呢?所以 香港快運 啲飛機,係咁無厘頭咁ground咗,當然唔係因為乜嘢流感嘅理由,流感如果都可以搞到ground飛機,我相信沙士果陣,香港航空業一早停頓咗,香港仲未變疫埠住。

因於依家 香港快運 呢種狀況,所以我睇成個海航系啲航空公司都係危危乎,所以如果你係公幹,行程唔容許delay嘅,我建議就快啲改機票好過,我一向唔主張公幹坐廉航,或者管理有問題嘅航空公司(好似福景魚拉特),因為公幹時間即係金錢,班機準時,遠比飛機餐質素、機票價錢,或者機艙座位設置重要嘅(當然,你班洲際航線另計,坐到個人散晒之後去開會,都係一件好膠嘅事)。如果你唔係公幹,咁你買定旅遊保險算喇。當然,最好搵間可以賠航空公司執笠嘅旅遊保險,因為有啲保險公司係唔肯賠執笠嘅情況,雖然唔知海航系嘅財政狀態有幾差,但執笠呢個可能性,係應該一併考慮,同其他航空公司有啲唔同。(話雖,福景魚拉特,同埋阿美利加航空公司,都曾經file過Chapter 11,即係美國嘅破產保護令)。

當然,我建議海航集團,將 香港快運 同香港航空,賣俾非中國資本嘅星空聯盟成員公司算吧,例如ANA或者Lufthansa,至少鞏固香港機場喺袋鼠航線嘅地位先。唔好死人霸生地喇,你班中國人。

發表迴響

你的電子郵件位址並不會被公開。 必要欄位標記為 *