自由行動-min

歐盟為何對 自由行動 權利寸步不讓

英國同歐盟進行第二輪BREXIT談判,可惜係得個吉,一方面,英國唔想日後關於歐洲公民在英權利,或英國國民在歐權利嘅嘢,交俾歐洲法院審,另一方面,歐盟講明, 自由行動 權利,寸步不讓。英格蘭班鄉下佬,似乎未能面對一個現實,佢地心目中嘅BREXIT,根本唔可能存在。

自由行動 嘅歷史背景

自由行動 權利,固然係促進歐洲嘅經濟交流,但另一方面,其實亦係一種維持歐洲內部和平嘅重要手段,因為一旦有歐盟國家可以唔要 自由行動 ,有其他歐盟國家有樣學樣,其實好容易令一啲熄滅咗好耐嘅民族或疆界爭議重燃,成件事會膠到一個點。

有讀二次大戰史,都知捷克係其中一個火藥庫,因為捷克周圍都係一大堆唔同民族混居嘅地區,同奧匈帝國瓦解果陣劃界不當有關。所以慕尼黑會議後,唔只德國吞咗蘇台德區,係連波蘭、匈牙利都抽埋水一份,食咗果啲爭議地區。同樣,喺意大利、南斯拉夫、奧地利周圍地區,又係有呢啲亂七八糟嘅國界線。以往呢啲民族混居地區,係好容易擦槍走火,但依家由於有 自由行動 權利,就算你波蘭籍,都可以住番喺捷克領土上以波蘭人為主嘅地區,或者德國可以唔駛claim番以前普魯士嘅國界線,返去原本屬於德國嘅祖先土地,但又唔會引發主權爭議,因為大家都係一個歐盟嘅大家庭。甚至好多時,歐盟內部嘅獨立運動,其實只有一啲內政管理上嘅意義,因為border係唔會,亦唔可能存在。所以英國依家 BREXIT唔要 自由行動 ,簡直係引發歐盟內部,甚至愛爾蘭島上嘅戰火。北愛人反對BREXIT,就係一旦愛爾蘭土地上出現border,成件事會好膠,都柏林飛車上貝爾法斯特,講緊時速九十公里情況下,飛兩個鐘,但英國同愛爾蘭,邊個唔係揸架油渣車喺Motorway飛足每小時時速百四,甚至二百公里,大家諗吓當出現border果陣,成件事將會幾膠。

所以英格蘭嘅人,應該要明, 自由行動 權利係唔可以郁,BREXIT亦要㩒停,點樣喺歐盟嘅制度下,能夠改變英國經濟形態,呢個至係全英國人要面對嘅課題。應該鼓勵多啲英國人,去歐陸行使自由行動權利至係。

One thought on “歐盟為何對 自由行動 權利寸步不讓

發表迴響

你的電子郵件位址並不會被公開。 必要欄位標記為 *