壹週刊-內幕-min

壹週刊 真係想賣?

今期 壹週刊 嘅封面,真係令人大開眼界,竟然係攞自己依家個老闆嚟玩,編輯部好明顯係好唔歡迎黃浩呢個新老闆,勇過以往明報同信報賣盤果陣好多。因為信報賣盤果陣,多數係好似我呢啲自由身作者做賭撚,唔係封面古仔做賭撚。其實我反而諗, 壹週刊 係唔係真係想賣。

壹週刊 其實唔想賣

雖然黃浩都係一條賭撚,但黃浩肯定唔會好似肥佬黎咁大方,攞自己出嚟玩,而且呢啲擺明挑戰新老闆嘅作為,擺明搏炒,大家比較番明報同信報員工態度,就好清晰。咁究竟, 壹週刊 呢單交易實際搞邊科,成件事係越嚟越迷離。

只不過,同信報唔同係,由於 壹週刊 係一間上市公司旗下主要業務,再加上買方本身都有傳媒,如果黃浩提咗offer,而壹傳媒拒絕,黃浩又用自己嘅傳媒周圍爆響口,咁壹傳媒就有麻煩。所以,依家好可能有人玩將計就計,就係照樣收訂金,照樣提上股東大會,但跟住因為其他社會因素,所以單deal告吹,或者突然殺出個程咬金出嚟注資 壹週刊 ,咁成件事就可以唔賣之餘,又可以搏銷量攞彩,同埋應付到班「壹傳媒股東」嘅要求。

因為黃浩同其他「代客泊車」有啲唔同係,佢條友有傳媒在先,以及行為作風相對高調,再加上壹傳媒係上市公司,要評估小股東嘅反慹,令壹週刊同信報嘅處理方法係唔同嘅。當然,員工玩得越膠,話黃浩可以炒晒啲人,但佢嘅目標就更難達到。而一般呢啲deal,都要暗中要求原有股東擺平自己公司嘅員工,我個人唔係好信,黃浩無要求黎智英擺平果啲喺佢眼中好麻煩嘅 壹週刊 員工。

當然,黃浩係唔係有足夠財政實力,本身都係一大疑問,特別呢幾年,由亞視到成報都反映一樣嘢,就係果啲所謂中國資金,表面上係威係勢,事實上好多時啲資金週轉都係亂七八糟,所以我仍然好有興趣想知,黃浩憑乜嘢資金證明,證明到佢有能力收購 壹週刊 ,但遇上呢啲奇奇怪怪,騎騎呢呢嘅中資代表,要啲政治智慧去turn down呢啲友仔嘅offer。而依家,就睇黃浩點回應呢一期 壹週刊 嘅封面古仔,因為我相信呢份大禮係得到黎智英同意上「送」俾黃浩。

發表迴響

你的電子郵件位址並不會被公開。 必要欄位標記為 *