黃浩-min

黃浩 係唔係一個壹週刊合適買家:由財務角度睇

黃浩 宣布買壹週刊,呢啲傻仔交易,有人去死,你唔俾佢去死,我本來無太大反應。只不過,當我睇到幾日前嘅新聞, 黃浩 屬下嘅《E週刊》最近被人入稟高等法院追租兼收樓,我睇法就有啲唔同。 黃浩 究竟係唔係壹週刊合適買家,我認為應該企喺壹傳媒小股東果邊嘅獨立財務顧問,應該做一次盡職審查,九月決定呢單刁係太倉卒。

黃浩 會唔會變爛尾買家

首先,五億唔係一筆細嘅錢,如果 黃浩 可以爭人三個月租,爭到要業主入稟法院嘅,咁我想問,佢買壹週刊嘅資金,係邊個石頭爆出嚟?

當遇到呢啲買家,最正常做法,係要求 黃浩 交出一筆更大嘅訂金,唔會係交易金額百分之五咁少,而係至少係交易金額百分之二十,呢個至少保證,一旦 黃浩 撻訂,壹傳媒可以cover番聘請財務顧問、法律專業人士等嘅費用,畢竟如果 黃浩 真係走咗數,壹傳媒都唔係無損失,而上市公司管理層係有責任喺呢方面照顧小股東。

另外, 黃浩 係應該係所有小股東出示佢嘅資金證明(Proof of Fund,一般簡稱POF),一方面,證明 黃浩 係有足夠財政能力收購呢個項目,另一方面,亦要證明佢後面嘅資金,因為依家 黃浩 嘅資金不明,有可能波及壹傳媒其他無賣出去嘅刊物,造成商譽減值嘅問題,咁呢筆損失,一係黃浩加碼食咗佢,一係佢出示資金證明,令大家相信 黃浩 呢次收購,唔會影響壹傳媒其他刊物嘅商譽,咁樣至叫做完整咁保護小股東嘅做法。當然,小股東如果反對呢單交易,甚至主動提出供股,提供更多子彈俾壹週刊改革(但同時炒咗沙膽虹呢啲茂利),就更加之好。

本來 黃浩 提出真金白銀收購壹週刊,如果 黃浩 係一個睇落有能力嘅商人,呢次壯士斷臂,未必係壞事,留番資金俾蘋果日報發展係合理嘅,但依家 黃浩 嘅狀況,令人無法相信呢單交易係會成事,相反,一旦交易告吹,更可能為小股東以及壹傳媒本身帶嚟損失,我真係希望壹傳媒管理層審慎行事,黎智英都應該自己搵獨立財務顧問,睇睇呢單嘢,係唔係一單妥當交易。

利申:本人現時並無持有任何壹傳媒股票,或相關嘅任何金融產品。

發表迴響

你的電子郵件位址並不會被公開。 必要欄位標記為 *