錫金-min

錫金 觸發東亞戰爭嘅序幕?

大家都以為,依家呢個世界都係好太平,只不過,納粹化傾向越嚟越明顯嘅中國,好可能啲小型領土糾紛,就係搞出東亞大混戰序幕。好多人睇係南海,但我反而睇,依家中國同印度喺 錫金 邊境嘅爭奪戰,搞得唔好,真係會大打出手。

錫金 呢個火藥庫

首先,中國由大清帝國年代,已經不斷為 錫金 控制權大動干戈,先同尼泊爾人打,打到尼泊爾變中國藩屬國至大清帝國滅亡,跟住同英國人打,然後同繼承英國喺印度次大陸大部分利益嘅印度打,中國甚至去到2005年,至正式承認 錫金 係印度嘅其中一個邦,基於呢個因素,如果中國同印度開拖係東線,亦即係麥克馬洪線,或者中國宣稱嘅藏南地區,或達旺地區有軍事衝突,都未必開得成大片,因為中國軍隊喺補給等方面,或者可以攞到一刻間嘅戰術勝利,但戰略上係無法攞番達旺地區,呢個亦係點解六十年代中國同印度喺東線開片,中國戰術上贏咗都要退番去麥克馬洪線嘅原因。但 錫金 絕對係另一回事,因為乃堆拉山口中國唔係完全無法喺戰術上補給,中國可以由拉薩等城鎮得到補給,更何況依家有青藏鐵路。而大清帝國果陣,都係取道 錫金 ,然後一路打到去尼泊爾,中國或者認為自己有機會開拖攞到勝利,呢啲睇落有得贏嘅地方,往往係戰略上最容易引發戰爭嘅地方。一如德國喺世界大戰開拖,堅開拖開始都係由入侵低地國家比利時開始先。

當然,依家印度係「一帶一路」戰略最大障礙,所以依家 錫金 一帶邊境僵持,好容易擦槍走火,有fake news話中國同印度喺 錫金 開咗拖,我個人梗係當fake news,但喺中國越嚟越有野心呢刻,如果 錫金 局勢醞釀落去,會唔會最終堅打,呢件事喺戰略上唔係無可能,特別如果中國有可能有經濟危機嘅話,有可能未正式爆發危機就已經打咗先,一旦進入戰時狀態,中國政府班友以為做乜都得,包括喺香港搞23條都得,屆時成件事就會十分之混亂。而中國喺陸軍有相對優勢,海軍反而戰力未經驗證,如果中國可以迅速喺印度攞到小規模嘅陸戰勝利,就已經有可能迫到印度妥協,屆時全中國都喺一片歡呼聲之中,一如希特拉都係搵啲弱國劏咗先。而且印度同俄國太老友,美國可能會食花生,坐山觀虎鬥。

總之大家留意住 錫金 ,乜事都可以發生。

發表迴響

你的電子郵件位址並不會被公開。 必要欄位標記為 *