壹週刊-min-3

壹週刊 賣盤

壹週刊 終於都係要連同其他壹傳媒雜誌資產賣盤,當然,對好多 壹週刊 多年讀者,呢個決定令人心傷。只不過,由傳媒管理嘅角度,以及對中共政治戰略嘅了解,如果香港人只係識得一味傷春悲秋,而唔採取實際行動,香港人好快乜都無得睇。

壹週刊 呢種format一早out咗

首先,作為做過吓(唔係資深果隻,好低級啫)嘅傳媒管理人, 壹週刊 居然喺中共用長春圍城戰戰略下包圍仲捱到依家,已經係叫體質極佳。因為依家讀者要求嘅資訊太快,除非 壹週刊 投放極大心力喺調查報導上面,否則你調查報導,未必夠眾新聞、Factwire甚至小弟嚟得爆,要等你成個禮拜至有單堅料,咁買嚟做乜?早喺2004年,月刊已經係無競爭力嘅format,香港好多傳媒管理人都諗唔出突圍之路,依家只不過輪到周刊。新買家將 壹週刊 左手掟右手,但我覺得唔會捱過五年,特別網媒已經快太多嘅年代,大家撫心自問,有幾多人依家仲睇 壹週刊 ,鬧肥佬黎係契弟之前,都要睇番成個客觀大環境嘅。

另一方面,中聯辦叫晒啲人唔喺壹傳媒落廣告,其實係用長春圍城戰戰略對付壹傳媒,呢個對中共黨史有少少認識都知,如果泛民支持者係堅醒嘅,係要堅持買蘋果日報,或者click吓廣告,但有啲本土派,就懵盛盛聽黃毓民條仆街講,係咁鬧人毒果,但完全忽略咗黃毓民以前都曾經被肥佬黎救濟。有啲係泛民支持者,但動新聞多啲廣告都埋怨,咪中共產黨下懷,特別有幾多人會落街買份實體報紙睇吓,大家撫心自問。

有時候,共產黨嘅長春圍城戰戰略行得通,都係睇中香港人嘅心理,有啲Facebook page賣吓廣告都要鬧,以為啲人可以靠光合作用嚟生存,一係支持一啲明泛民暗親共嘅網媒,好似獨媒、輔仁、熱血、立場呢啲垃圾,甚至,結果依家真係最有實力果個,亦即壹傳媒集團就快被玩死,當蘋果呢棵大樹倒下,你覺得獨媒、輔仁、立場呢啲有人睇,甚至你睇吓D100啲立場都係好有問題。唔係咁多人一早部署自營媒體,同埋將主要地盤搬離香港,就算大孖沙,都係得李嘉誠有步驟咁部署離開香港喇。

壹週刊 賣盤唔係鬧肥佬黎嘅時候,香港人應該係問吓自己,有無犯咗一啲戰略上嘅錯誤。

發表迴響

你的電子郵件位址並不會被公開。 必要欄位標記為 *