田北俊-東方海外-min

田北俊鬧爆 東方海外 賣盤係鬧得好

東方海外確認賣盤,只不過,董建華做咗咁多賣港虧心事,用一個根本係貴嘅價錢,引中遠買東方海外,邊個第一個走出嚟鬧爆佢?大家都估佢唔到,就係已經唔喺政壇嘅自由黨榮譽主席 田北俊 。佢係政界人士,少數鬧爆呢個混帳交易。

田北俊 係鬧得 東方海外 好好

田北俊 係鬧得好,因為大家都知,董建華家族賣 東方海外 嘅錢,根本唔會留喺香港,好大機會係去咗美國,依家將中遠啲錢再帶去美國,呢啲係愛國行為嚟㗎,我未聽過喎,呢劑好大機會係走資行為,仲要保留東方海外喺香港嘅總部以及上市地位,方便中遠再諗計炒多兩轉搵銀,有少少生意頭腦,都知董建華呢啲唔係叫愛國,係叫愛國賊。做賊做到咁揚,啲中國人仲係沉醉於遼寧號件廢鐵度唔出聲,我個人堅係寫個服字俾中國人。一條友賣完香港,再賣中國,然後發大財仲要扮X晒愛國,真係汪精衛都只能嘆自己投胎得太遲,投胎遲幾十年,真係做咗大富豪。

另一方面,中遠海運用成31%溢價收購東方海外,東方海外堅係值呢個錢?究竟東方海外嘅31%溢價係邊個石頭爆出嚟嘅呢,老實講,我堅係識條鐵,依家世界航運界前景唔好,東方海外賣俾人正常,但法國佬向新加坡淡馬錫控股收購擁有APL嘅海皇輪船(NOL)果陣,溢價都只不過係6%,你依家中遠用成31%溢價收購東方海外,我唔知東方海外資產有幾靚,但如果佢嘅資產唔係特別靚嘅話,我只能講,果31%溢價,根本係俾佢嘅賣港收益,咁嘅話,董建華除咗叫做對東方海外嘅小股東有所交代外,佢係出賣晒全香港嘅人,去賺呢筆大錢,真係對好多人嚟講,火唔嚟就奇。

當然,掛住代表中華民國嘅梅花徽號嘅東方海外,變成共產黨嘅公司,亦反映咗國民黨呢班友,都係一班見錢開眼,祖宗都可以賣嘅人渣,依家國民黨一句聲都無出過,就知東方海外赤化呢件事,係充分反映國民黨呢班人渣嘅價值觀。

都係果句,依家董建華靠賣港發達,雖然都係定局,但可以向世界各國嘅監管機構去信,特別反壟斷機構,令董建華見財化水機會唔大都好,都令中遠唔好堅係買到啲有價值嘅嘢。當然,香港人係日後要清算董建華冚家,賺得呢啲陰質錢,你認為無代價嘅。

發表迴響

你的電子郵件位址並不會被公開。 必要欄位標記為 *