遼寧號-take嘢-min

星期日休息 : 遼寧號 與Take嘢民族

企硬,Take嘢衰硬,相信呢個政府禁毒口號,大家都聽過。只不過,呢句更適合果啲沉醉喺 遼寧號 垃圾成就嘅人,不論自帶五、五毛,定係一啲同港大親共國是學會行得密,又埋本土果啲粉腸。 遼寧號 係政治take嘢,而一個喺政治上慣咗take嘢嘅民族,又擅長搞啲化工毒品,全民take嘢一定,全民hihi係乜嘢世界都咪話唔得人驚。

遼寧號 take嘢 民族主義

喺1918年德國Kiel港起義後,德意志帝國瓦解,一次大戰亦因此結束,新生嘅威瑪民主共和國,因戰後創傷嘅緣故,充斥住大量take嘢尋求填補心靈空虛嘅人。呢部分,正係Norman Ohler嘅書Blitzed: Drugs in Nazi Germany嘅發生背景,Norman Ohler雖然係德國小說作者,但呢本書都係睇過晒美國同德國政府收藏關於納粹政府嘅檔案而寫,所以都頗為接近史實。而喺希特拉呢位唔煙唔酒嘅人上台之後,立即抽全民禁毒嘅水,用嚟宣傳反猶太政策,以及加強對德國嘅社會控制。咦,呢啲咪同學校社區驗毒計劃咁似,無錯,都係果啲仆街嘢,所以歷史成日都係重覆又重覆。

當然,唔俾你take嘢,但德國一早全民take嘢,咁都係要搵另一啲替代品,而政治狂熱思想,好明顯係其中一項替代品,所以點解中共咁鍾意請 遼寧號 ,或者要搞國民教育呢啲仆街嘢,如果繼續由得香港唔少年青人相對清醒,我想問啲獨裁者點玩政治搶劫先,根本就唔多可能喇。由一種毒品改為一種叫政治意識形態嘅毒品,可以講係一種老招數,希特拉都用咗好多鑊。

但更黐線嘅事喺後頭,有一間叫Temmler嘅公司,出咗隻藥叫Pervitin,純粹叫Pervitin你唔知係乜,如果講出佢嘅學名大家就知係乜:methamphetamine,即係冰。喺Pervitin推出後,由於呢隻藥當時唔駛處方周街有得賣,食完可以頭腦清醒唔駛瞓,結果成個德國阿茂阿壽,人人都要食番一粒半粒,後喺去到閃電戰進軍波蘭同法國果陣,直頭派俾軍人,以便進行連續幾十個鐘都唔駛瞓嘅任務,某程度上,係take完嘢至打到突襲阿登山谷呢啲對德國國防軍嚟講匪夷所思嘅戰略。大家可以諗到,全民take嘢嘅德國,啲人會做出啲乜嘢事,同做出啲乜決定,大家諗吓,果陣德國幾乎係國防軍全部take冰之類嘅化學品,後嚟德軍表現奇差,其實都多少同take嘢有關,畢竟take嘢有代價。本來成個民族都take嘢上癮,依家係政府由得啲冰喺全國係咁派,真係果陣有乜結果出現,大家都可以估到。

希特拉自己都唔弱,為咗示人以強,佢果位私人醫生Theodor Morell,最初打啲營養大補劑,後嚟打類固醇,最後打oxycodone,亦即係Michael Jackson狂打打到死果種麻醉劑,之後希特拉究竟係唔係神智清醒下作出重大軍事決定,相信大家都有好清楚嘅答案。

全民take嘢,不論思想上嘅take嘢,定係堅take嘢,都係一件好危險嘅事,而我有一點特別提醒大家,中國淘寶網同阿里巴巴有好多強力迷幻藥當化工原料咁賣,然後銷到西方國家,中國政府根本無管制,引起好多問題。我唔信呢啲迷幻藥,根本係流出中國市面,隨時中國政府有必要果陣,都可以縱容啲古怪藥物流通,用嚟麻醉國民。對獨裁者嚟講,國民思想上take嘢同實際上take嘢都係最好管,當人民係機器咁用都得。呢個亦係我對 遼寧號 果隻民族主義,以至國民教育本身都十分之反感嘅原因。take嘢要戒係好痛苦,唔係個個似德國人咁,可以痛定思痛,唔亂再take嘢。

當然,五毛係一班上癮者,特別自帶五,甚至唔少香港中老一輩都係,要一班成咗癮嘅友仔戒毒,其實係好難嘅事,所以德國嘅去納粹化措施係行得十分之有力,而日本老一代仲發軍國主義嘅春秋大夢,其實某程度上就係呢種毒癮,甚至依家俄國普京嘅出現,都係呢種毒癮發作,只不過由納粹黨改咗做共產黨咁解啫。所以我睇完Blitzed, 我真係唔會同五毛辯論咁多,一班上咗癮嘅人,你仲同佢拗?民族主義唯一有效治療藥物,係一次重大挫敗後國際社會監督下嘅重建同新生。只不過,中國喎,咁容易?

發表迴響

你的電子郵件位址並不會被公開。 必要欄位標記為 *