遼寧號-阻街-min

遼寧號 喺香港擺官威勁過美國航空母艦

遼寧號 係一舊廢鐵,想嚇香港人反被香港人笑,呢個都算。但解放軍班白痴似乎嫌自己膠唔夠,竟然喺有一個新渡輪駛經摩星嶺對開海面果陣,叫水警截停離島嘅渡輪,讓路俾 遼寧號 。呢件事,真係令大家多一項證據,對中國解放軍反感。

美國航空母艦都無 遼寧號 咁惡

美國航空母艦經常訪港,而小弟亦曾經有幸被美國駐港領事館邀請登艦參觀,仲要係企業號。美國航空母艦,相信係世界上數一數二嘅恐襲目標,只不過,美國航空母艦未曾試過惡到因為使用維港或其他香港水域航道,而要阻止香港其他正常民用船隻使用。除非喺戰時狀態,否則軍艦唔應該有任何優先使用權,就算你可以有呢個權利,作為親善訪問,都應該係以不擾民為目標,依家中國 遼寧號 嘅表現真係十分之清楚,就係以十分之無禮貌嘅方法,向香港人講我解放軍班友大晒,你班友吹呀。呢種咁嘅態度,除咗愛黨力果班土共,以及中共洗腦洗到hi咗嘅糞青,我睇唔到有邊個會對呢種態度表示歡迎。更何況喺香港,阻人返工真係罪大惡極嘅行為嚟。

我相信咁玩落去, 遼寧號 訪港,不單唔會令香港人放棄港獨思想,相反,更多人會相信,依家中國喺香港施加係一種極其惡劣嘅殖民統治,因為英國軍艦訪港,就算喺英治年代,仲要果陣愛爾蘭共和軍仲未同英國政府停火,都唔會咁樣妨擾香港市民。相反,英國過往喺香港治軍,係採用英軍同香港社會融為一體嘅態度。我係住港島長大,基本上,港島人學英文,除咗聽BBC World Service嘅廣播,就係聽BFBS(British Force Broadcasting Service),而1997年前,香港人要進入英軍駐守範圍,都唔會好似依家咁諸多管制,以前正義道軍營皇后大道嘅入口,其實係英軍超級市場嚟,我都入過去見識,一到1997年,即刻當香港人係賊咁辦,乜嘢係新帝國主義,新殖民主義,真係昭然若揭。

官威越擺得勁,港獨思想發展得越勁,呢個作用力等於反作用力嘅基本政治定理都唔識,中國人玩政治,玩多一千年都係玩啲史前垃圾出嚟。

發表迴響

你的電子郵件位址並不會被公開。 必要欄位標記為 *