假如我係東亞嘅公關

首先,平日我係唔多想講咁多財經嘢,因為講錯講漏都會被人笑到面黃。如果唔係近日風大雨大成咁,我寧願寫多幾篇政治。

言歸正傳,頭先好仔細刨咗東亞嘅年報,更加唔明點解東亞呢鋪擠提事件可以搞鑊粥。首先,大家睇睇東亞銀行中期業績:

東亞銀行中期業績2008

俾著係我,我會將26頁關於每年資本充足比率嘅表列出嚟,去年12月嘅充足比率係12.6%,而今年係14.7%(重列咗違例交易損失後係14%),去年核心資產充足比率係7.4%,依家係9.4%,核心資產由1844億加到2331億咁查實已經講得好清楚,東亞銀行係有能力,而且在個市咁差積極提高資本充足比率,咁好多人已經會心情平復。

順便講埋第33頁,話東亞玩CDO,以及SIV的資產比重好低,咁有心玩嘢嘅友仔已經會收口,至少玩唔落去。可能果十四隻CDO有乜冬瓜豆腐都好,唔影響銀行嘅,咁已經過到骨。

用傲慢嘅態度嚟應對市民,結果只係有人食花生。如果真係有人想借擠提嚟狙擊東亞,唯一解釋係,呢班友都係釣魚黨,研究過東亞管理層嘅心理弱點至落手,好多公司都忽略咗公關部嘅作用,成日覺得佢係支援部門覺得佢煩,依家呢件事,大家可以睇到公關部嘅主管,係需要一個戰略家去做,唔係識得同記者飲飲食食就算。就算公關部主管,唔係戰略家,都可能需要類似政治顧問嘅人,有事果陣決定點拆彈,依家個社會越來越膠,人民對企業越嚟越不信任,突然遇到金融恐怖分子,平日唔應變慣嘅,一出嚟打仗咪變炮灰,或恐怖分子點心。

延伸閱讀:
林忌:垃圾危機管理
港燦:搏懵

2 thoughts on “假如我係東亞嘅公關

  1. 有時D老細死蠢, 同埋懶醒亂Up野, 個公關幾叻都無用, 東亞位彭先生, 最經典係向一班小朋友級的中大學生發老脾, 講”I will use all my power not to employ you!”, 上咗幾日報紙.

    跟著佢的PR, 算唔好彩了, 要幫佢執手尾.

    http://www.inmediahk.net/node/29440

  2. 我前一個post就講過彭玉榮嘅經典事跡。佢昨天仲問記者識唔識做銀行,如果唔係李國寶沙場經驗豐富,做東亞嘅PR真係都唔知點同佢收科。

    公關查實係一個參謀部門,平日參謀部梗係唔駛指揮權,但如果參照德國二次大戰前的制度,在一些事件,特別要危機處理,公關部應該有更大的權限至得,包括制止某些人亂講廿四。呢鋪彭玉榮幾乎玩謝佢自己。

發表迴響

你的電子郵件位址並不會被公開。 必要欄位標記為 *