英治香港-min

星期日休息:當左膠都會懷念 英治香港 時

林輝係左膠,相信大家唔會否認,佢自己都可能承認。但如果以下呢番懷念 英治香港 嘅話,係出自林輝手筆,而唔係出自本身係大號親英派,因印尼華人複雜歷史緣故而受惠於英國統治嘅黃世澤,大家有無嚇一跳,但以下懷念 英治香港 嘅話,確係出自林輝嘅口。

如果有人問:為甚麼你們懷緬殖民地時代的香港?很簡單,看看當時,看看今天,這是正常不過的反應。

英治香港 嘅本質

作為一個研究南洋史作專項嘅南洋人,西方國家喺世界大部分地方建立殖民地有掠奪特質,我都唔否認呢個事實,呢個亦係西方大愛左膠原罪感嘅來源。但香港呢個殖民地,可能係西方歷史一個奇例,因為好少殖民地最終變成西方國家其中一個主要城市(新加坡都係獨立後至變成一個世界最重要城市),香港係英國歷史上一系列,除咗港口,乜天然資源都無嘅殖民地,甚至係更大鑊,直布羅陀都唔駛處理難民,但1949年中國易幟後嘅香港本質,係世界上最大型難民營,再加上另一個被共產主義國家包圍嘅自由城市,一如當時嘅西柏林,甚至主權情況都極為類似,喺1990年4+2協議締立之前,雖然西柏林人好多嘢都係由西德政府管理,但主權喺英、法、美三國手上。甚至國籍上怪異度,都可以同西柏林一併,喺兩德統一前,西柏林人唔具備英國、法國或美國國籍,係要用啲膠方法,揸住本西德護照。

正由於香港係世界最大難民營,亦係遠東嘅自由堡壘,所以 英治香港 嘅統治上,英國政府採取十分唔同嘅立場,特別喺1967年共產黨意圖用暴動推倒英國嘅統治後,西方世界極少用同管治本土一樣嘅心力,去管治一個遠方無資源,但係有幾百萬文化完全唔同嘅難民居住嘅城市,特別係麥理浩嘅改革。甚至如果唔係共產黨嘅破壞,香港一係變成另一個自治領,一係會同直布羅陀一樣,變成另一個有殖民地之名,但為英國本土一部分之實嘅城市。所以,香港人比較番中國共產黨搞嘅真殖民統治,懷念 英治香港 根本只係常識嚟。

華人,甚至東方人對歐洲認識好少,認識都只係流於器物層面,對法律文化嘅認識,都係近年因互聯網興起,以及大批華人移民西方國家所致,甚至好多人都係未認真認識西方文化。其實當你明白 英治香港 嘅本質果陣,就明點解香港係不光榮撤退,西方以為將香港交俾中國,可以拉攏中國對抗蘇聯嘅同時,香港可以用東方嘅西柏林嘅姿態,影響到中國,為中國帶嚟改變,但事實上,西方犯咗自慕尼黑會議以嚟,最大嘅綏靖主義錯誤,中國走上咗同明治維新後日本帝國一樣嘅路,學習西方嘅器物,甚至經濟制度,但終極目標只係無限制嘅擴張,以及對人民嘅欺壓,而唔係認真學習作為文明社會嘅一員,應盡嘅責任以及義務。所以我話英國重返香港,並唔係純粹靠國際法嘅理論,或純粹個人經驗嘅感性認識,而係有對西方歷史了解嘅基礎,特別係現代香港喺東西方歷史上獨特嘅位置,呢個亦係近日不斷有西方媒體聚焦香港嘅原因,因為香港嘅不光榮撤退已成事實。彭定康不斷喺西方報章,以幾乎係香港流亡政府首長嘅姿態,為香港發聲,呢個係英國歷任殖民地末任總督所未見。

當然,英國仍然有啲死唔認錯嘅中國通,至今都唔認為自己做咗蠢事,例如衛奕信勳爵,但不論彭定康,定係衛奕信嘅行為,都可以用電影《桂河橋》(片裡面故事係虛構)裡面,督導桂河大橋建造嘅英國上校Lieutenant Colonel Nicholson去了解,為咗榮譽,不惜一戰,亦不惜一死,即使同袍操戈。彭定康認為自己喺香港嘅撤退並不光榮,所以佢極力向英國人解釋香港嘅苦難,呢個係未來BNO平權嘅最大助力嚟。而衛奕信,認為《中英聯合聲明》係自己嘅傑作,一如Nicholson要阻止盟軍炸毀桂河大橋嘅心態一樣,呢套片幾乎係了解英國文化,特別係政治文化必修,因為香港以至成個華人社會,除咗南洋部分Queen’s Chinese所無,就係呢種追求光榮嘅文化。李光耀係少數呢方面嘅傳人,所以至有李瑋玲同李顯揚不惜一戰,都要堅持拆毀歐思禮路38號嘅事件。 英治香港 被人懷念,既是英國人嘅光榮,亦係英國人嘅恥辱,而英國人為補償呢段恥辱,會做好多華人社會想像唔到嘅事。

發表迴響

你的電子郵件位址並不會被公開。 必要欄位標記為 *