劉曉波-min

劉曉波 臨死才得自由:中國同北韓有乜分別?

雖然我係獨派,但作為《零八憲章》聯署人之一,我對 劉曉波 竟然去到末期肝癌,藥石無靈,連做手術、做化療同做電療都做唔到嘅情況下,至可以獲保外就醫,感到哀傷同憤怒。

劉曉波 只不過提出一個卑微嘅要求

由我簽署《零八憲章》到依家,我立場一直無變,劉曉波只不過用最和平方式請願,要求中共履行當權前嘅承諾,以及中華人民共和國憲法所保障嘅公民權利,佢只不過想阻止中國最後再度出現流血革命,呢個有乜錯,呢個亦係佢得到諾貝爾和平獎嘅原因, 劉曉波 話佢無敵人,除咗中共,佢確實無敵人,連我呢個親英嘅人,到今時今日到仍然企喺佢果面,因為佢嘅主張如果能實現,其實對全世界都係好。好不幸,中共竟然喺 劉曉波 身上,展現佢最殘暴嘅面目,等到 劉曉波 無法治療嘅情況下,至俾佢保外就醫,呢個仲唔係金正恩對付美國學生果種手法。金正恩已經因呢件事,被公認係世界一等人渣之一,而中國咁對一個諾貝爾和平獎得主,就更證明中共呢班友,根本係人渣中人渣。

劉曉波 被迫害至死呢件事,其實提醒無數對中共仲有幻想嘅人,中共只係一班講求實力至上嘅人,只要夠硬嘅拳頭,至會令中共學習尊重人權,一如日本自由民權運動,由明治維新至1945年都徒勞無功,相反,自由民權運動嘅理想,喺美國佔領日本期間得到實現,今日日本人享有嘅民主自由,某程度上係美國人所給予日本人嘅禮物,可以講係真正嘅以德無怨,我相信,如果真正嘅以德報怨,並唔係放走中共呢個大魔頭,而係可能真係要考慮佔領中國,或者將中國解體,令到 劉曉波 《零八憲章》上面嘅理想得到實踐。你或者可以話我偏激,但現實中嘅中國,情況就係如此令人搖頭嘆息,特別有成班中共五毛,竟然認為自己國家無問題,同二次大戰期間嘅日本人一樣。

咁恕我作出最後一個要求, 中共應該立即安排 劉曉波 以及劉霞前往挪威,接受寧養治療,至少佢臨離開人世前,接受佢應該接受嘅榮譽:諾貝爾和平獎。如果等到 劉曉波 死咗都攞唔到呢項榮譽,中國人同中共就永遠釘喺歷史嘅恥辱柱上,呢個國家同民族,唔會再有人尊重。

One thought on “劉曉波 臨死才得自由:中國同北韓有乜分別?

發表迴響

你的電子郵件位址並不會被公開。 必要欄位標記為 *