湯家驊-min

湯家驊 入行會:搵舊無能量嘅廢電池做乜

林鄭月娥宣布,委任 湯家驊 入行政會議,佢無做律政司司長已經係不幸中嘅大幸,因為日後行政會議啲bill,應該無梁振英年代果啲寫得咁垃圾。畢竟 湯家驊 都係一個會認真睇bill嘅人。只不過, 湯家驊 入行會,如果話會為泛民同政府溝通做到啲乜,我覺得就無乜可能,佢只不過係一個無能量,被人鄙視嘅廢電池,搵個政治垃圾入去有乜用。

湯家驊 啲花名已經話俾大家聽乜事

政壇好多人嘅花名,都可能基於一啲不盡不實嘅謠言,但有啲唔係空穴來風,好似 湯家驊 嘅花名叫十一哥,成日啲人同雪廠街三個字同 湯家驊 拉埋一齊,當然當中涉及乜事,我費時被人出律師信而一啲著數都無,費時講落去,但可以肯定係,喺重視道德多於一切泛民, 湯家驊 果堆花名,已經反映泛民唔再信佢。一個泛民喺道德上唔信嘅人,其實同劉江華差唔多,甚至差過劉江華,你覺得佢可以搭建政府同泛民之間嘅關係?呢啲真係笑料嚟。我諗去到被委任為局長最後一日至退出民主黨嘅羅致光,更可能私底下同泛民溝通到。

大家要留意,公民黨內部一向成日互片,特別大狀之間,意見分歧好正常,但點解 湯家驊 係特別要脫黨,公民黨一係年青果班頂唔順太膠主動退黨,但老果班,意見點分歧都好少訴諸退黨, 湯家驊 究竟搞出乜事出嚟,我相信係好多人都十一哥呢個名咁講得順口嘅原因。所以, 湯家驊 或者喺度扮民主派,或者喺不得不轉陣營嘅情況下,盡全力保住自己心底裡嘅睇法,不斷係咁講嘢踩鋼線,唔似得好似劉江華、陳財喜呢啲人渣,入咗去就真係人渣到底,但佢同泛民中人既然無互信基礎,甚至好似我咁,好早覺得勢色唔對,直頭同佢斷埋交,連朋友都無得做,咁林鄭月娥委任 湯家驊 做乜?又推進唔到政改,又無法令《基本法》23條立法,又同泛民溝通唔到,相反,大家只會對林鄭月娥委任呢個行政會議陣容戴住有色眼鏡,就算林鄭月娥成功趕走張志剛啲怪獸都好,你委任件 湯家驊 只不過令人笑,除咗可以令袁國強未來半年勤力啲做嘢之外(同一個Chamber,但 湯家驊 輩份高好多),我真係睇唔到當中仲會有乜價值。

發表迴響

你的電子郵件位址並不會被公開。 必要欄位標記為 *